ភ្នំពេញ៖ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ និងលោក Lu WEI ប្រធានក្រុមប្រឹក្សាភិបាលក្រុមហ៊ុន អង្គរ អ៊ិនធើណេសិនណល អ៊ែរផត អ៊ិនវេសម៉ិន (ខេមបូឌា) ឯ.ក សហការគ្នាបង្កើតព្រឹតិ្តការណ៍ថ្មីៗនិងជាលក្ខណៈអន្តរជាតិ ដើម្បីទាក់ទាញភ្ញៀវទេសចរជាតិ និងអន្តរជាតិមកទស្សនាខេត្តសៀមរាបបន្ថែមទៀត។

ក្នុងជំនួបពិភាក្សាការងារជាមួយលោក Lu WEI កាលពីថ្ងៃទី៨ ខែកក្កដា ឆ្នាំ២០២៥ ឯកឧត្តម ហួត ហាក់ បានកោតសរសើរចំពោះគំនិតផ្តួចផ្តើមរបស់ក្រុមហ៊ុនដែលបានសម្លឹងឃើញពីសក្តានុពលទេសចរណ៍ដ៏សម្បូរបែប និងកាលានុវត្តវិនិយោគរបស់ខេត្តសៀមរាប តាមរយៈការបង្កើតព្រឹត្តិការណ៍ទេសចរណ៍ថ្មីៗ ទាក់ទាញ និងជាលក្ខណៈអន្តរជាតិ ស្របនឹងឱកាសនៃយុទ្ធនាការណ៍ឆ្នាំទេសចរណ៍កម្ពុជា-ចិន២០២៥ ដើម្បីទាក់ទាញភ្ញៀវទេសចរជាតិ និងអន្តរជាតិឱ្យកាន់តែច្រើនមកទស្សនាខេត្តសៀមរាប។

ទន្ទឹមនេះ ឯកឧត្តម ហួត ហាក់ បានអរគុណចំពោះការខិតខំប្រឹងប្រែងរបស់ក្រុមហ៊ុនដែលបានជួយជំរុញកំណើនភ្ញៀវទេសចរឆ្លងកាត់អាកាសយានកើនឡើងជាបន្តបន្ទាប់។ ក្នុងកិច្ចពិភាក្សាការងារនេះ លោក Lu WEI ក៏បានរាយការណ៍ពីស្ថានភាពភ្ញៀវទេសចរធ្វើដំណើរតាមអាកាសយានដ្ឋានអន្តរជាតិសៀមរាប-អង្គរ និងស្នើសុំអនុសាសន៍ និងការគាំទ្រដ៏ខ្ពង់ខ្ពស់លើគម្រោងរៀបចំព្រឹត្តការណ៍ទេសចរណ៍ថ្មីៗ និងជាលក្ខណៈអន្តរជាតិផងដេរ៕