ភ្នំពេញ៖ ឯកឧត្តម កាន់ ម៉ន រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ និងឯកឧត្តម វ៉ី សំណាង អភិបាល នៃគណៈអភិបាលខេត្តតាកែវ បានបើកកម្មវិធី «វេទិកាការងារ» ដើម្បីនាំយកឱកាសការងារជិត ៥០០កន្លែង ដល់ប្រជាពលរដ្ឋ ពិសេសពលករខ្មែរដែលទើបត្រឡប់មកពីប្រទេសថៃ នៅថ្ងៃទី៦ ខែសីហា ឆ្នាំ២០២៥។

ក្នុងឱកាសនោះ ក្រុមការងាររបស់ក្រសួង បានផ្សព្វផ្សាយអំពីឱកាសការងារ ការបណ្តុះបណ្តាលជំនាញបច្ចេកទេស និងវិជ្ជាជីវៈ និងអត្ថប្រយោជន៍នៃរបបសន្តិសុខសង្គម (ប.ស.ស.) ដល់អ្នកចូលរួមចំនួន ១ ៨៤៦នាក់ ក្នុងឃុំចំនួន៦ រួមមាន៖ ឃុំត្រាំកក់ ឃុំស្រែរនោង ឃុំញ៉ែងញ៉ង និងឃុំគុស នៃស្រុកត្រាំកក់ ឃុំព្រៃស្លឹកនៃស្រុកទ្រាំង និងឃុំរមេញ នៃស្រុកកោះអណ្តែត។ ជាមួយគ្នានេះ ប្រជាពលរដ្ឋ និងពលករខ្មែរ ចំនួន ៣៥០នាក់ បានទទួលការងារភ្លាមៗពីក្រុមហ៊ុនធំៗ ដែលមានតម្រូវការកម្លាំងពលកម្មសរុបចំនួនជិត ៥០០កន្លែង៕