ភ្នំពេញ៖ សហព័ន្ធស្រូវអង្ករកម្ពុជា បានបើកឱ្យប្រើប្រាស់ជាផ្លូវការសម្រាប់ជំហានទី០៩ សម្រាប់កម្មវិធី« ទិញ-លក់ស្រូវ»តាមទូរស័ព្ទដៃ (Mobile App) កាលពីថ្ងៃទី២៧ ខែកុម្ភៈ ឆ្នាំ២០២៤នេះ។ កម្មវិធីនេះបង្កើតឡើង ដើម្បីបង្កភាពងាយស្រួលដល់ ប្រជាកសិករ តាមរយៈតំណាងសហគមន៍នៅក្នុងតំបន់នីមួយៗ អាចផ្តល់ព័ត៌មានអំពីស្ថានភាពស្រូវ ប្រភេទ ស្រូវ និងកាលបរិច្ឆេទប្រមូលផលដល់ឈ្មួញប្រមូលទិញផងដែរ។

បើតាមសេចក្តីប្រកាសព័ត៌មានរបស់សហព័ន្ធស្រូវអង្ករកម្ពុជា កម្មវិធី«ទិញ-លក់ស្រូវ»តាមទូរស័ព្ទដៃ ដែលបានដាក់ឱ្យប្រើប្រាស់ផ្លូវការនេះ បានបង្កើតឡើងតាំងពីដើមឆ្នាំ២០២៣ ដែលផ្តល់ថវិកាដោយកម្មវិធីគ្រប់គ្រងធនធានទឹក និងផ្លាស់ប្តូរកសិកម្មនៅប្រទេសកម្ពុជា (WAT4CAM) ក្រោមជំនួយសហគមន៍អឺរ៉ុប តាមរយៈទីភ្នាក់ងារអភិវឌ្ឍន៍បារាំង (AFD) ។

គោលបំណងដែលសហព័ន្ធស្រូវអង្ករកម្ពុជា បង្កើតកម្មវិធី«ទិញ-លក់ស្រូវ»តាមទូរស័ព្ទដៃនេះឡើង ដើម្បី បង្កភាពងាយស្រួលដល់ប្រជាកសិករ តាមរយៈតំណាងសហគមន៍នៅក្នុងតំបន់នីមួយៗ ក្នុងការផ្តល់ព័ត៌មានអំពីស្ថានភាពស្រូវ ប្រភេទ ស្រូវ និងកាលបរិច្ឆេទប្រមូលផលដល់ឈ្មួញប្រមូលទិញ។ ជាមួយគ្នានេះ ភាគីរោងម៉ាស៊ីនកិនស្រូវ អាចប្រកាសអំពីគោលបំណងលើប្រភេទស្រូវ និងចំនួនដែលខ្លួនត្រូវការឱ្យដល់ ឈ្មួញប្រមូលទិញ សហគមន៍កសិកម្ម ឬកសិករ ដែលមានស្រូវហើយចង់លក់ និងឈានទៅរកការផ្គូរផ្គង ពាណិជ្ជកម្មផងដែរ៕