ភ្នំពេញ៖ ក្រុមហ៊ុន YAZAKI (Cambodia) Products Co., Ltd. នឹងផលិតខ្សែភ្លើង និងគ្រឿងបង្គុំសម្រាប់រថយន្ត នៅខេត្តកោះកុង និងគម្រោងពង្រីករោងចក្របន្ថែម ដែលគ្រោងនឹងចាប់ផ្ដើមផលិតកម្មនៅចុងនៅឆ្នាំ២០២៧ ខាងមុខនេះ។

ក្នុងជំនួបនៅថ្ងៃទី៣១ ខែមីនា ឆ្នាំ២០២៦ ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា បានង្ហាញការគាំទ្រលើគម្រោងពង្រីកវិនិយោគបន្ថែមរបស់ក្រុមហ៊ុន ដែលនឹងអាចបង្តើតការងារបានប្រមាណ ១ពាន់នាក់ និងបន្ថែមការងារដែលមានស្រាប់នៅខេត្តកោះកុងប្រមាណ ២ពាន់នាក់ ដែលនេះបានបញ្ជាក់អំពីជំនឿទុកចិត្តរបស់ក្រុមហ៊ុន មកលើរាជរដ្ឋាភិបាលកម្ពុជា ទោះបីជាស្ថិតក្នុងស្ថានភាពប្រឈមនានានៅក្នុងពិភពលោក និងក្នុងតំបន់។

ជាមួយគ្នានេះ លោក YOSHIMOTO ITO នាយកប្រតិបត្តិរបស់ក្រុមហ៊ុនសាជីវកម្ម YAZAKI Corporation. បានអរគុណយ៉ាងជ្រាលជ្រៅជូនរាជរដ្ឋាភិបាល និងក្រុមប្រឹក្សាអភិវឌ្ឍន៍កម្ពុជា ដែលតែងតែគាំទ្រក្នុងរាល់ដំណើរការផលិតកម្មរបស់ក្រុមហ៊ុន និងបានផ្តល់ឱកាសឱ្យក្រុមហ៊ុនមានលទ្ធភាពពង្រីកការវិនិយោគបន្ថែមទៀត៕