ភ្នំពេញ៖ អគ្គនាយកដ្ឋានគយ និងរដ្ឋាករកម្ពុជា (អ.គ.រ.) បានកសាងនូវសមិទ្ធផលសំខាន់ៗ រួមមានការកែលម្អវិធីសាស្ត្រ និងលក្ខណៈវិនិច្ឆ័យជ្រើសរើសសូចនាករហានិភ័យក្នុងការកំណត់មុខសញ្ញាទំនិញនាំចេញនាំចូល និងឆ្លងកាត់ ការធ្វើវិមជ្ឈការការងារផ្ទៀងផ្ទាត់តម្លៃគិតពន្ធគយ និងសម្អាងដើមកំណើតទំនិញ។ សមិទ្ធផលសំខាន់ៗទាំងនេះ គឺដើម្បីសម្រេចបានគោលបំណងជំរុញកិច្ចសម្រួលពាណិជ្ជកម្ម នៃយុទ្ធសាស្ត្រកៀរគរចំណូល របស់រាជរដ្ឋាភិបាល នីតិកាលទី៧ នៃរដ្ឋសភា។

គយ ក៏បានដាក់ឱ្យអនុវត្តកិច្ចដំណើរការលិខិតអនុញ្ញាតគយ តាមប្រព័ន្ធបញ្ជរតែមួយជាតិ និងបានពង្រីកវិសាលភាពនៃការអនុវត្តប្រព័ន្ធបញ្ជរតែមួយជាតិ ឈានដល់ដំណាក់កាលទី៣ ការដាក់ពាក្យស្នើសុំការអនុញ្ញាតផ្សេងៗតាមប្រព័ន្ធអេឡិចត្រូនិក ការកសាង និងដាក់ឱ្យអនុវត្តជាបន្តបន្ទាប់នូវមុខងារថ្មីៗ នៃ ប្រព័ន្ធស្វ័យប្រវត្តិកម្មគយ ការធ្វើសមាហរណកម្មមុខងារប្រតិវេទន៍គយសង្ខេប និងប្រព័ន្ធគ្រប់គ្រងហានិភ័យ គយទៅក្នុងប្រព័ន្ធអាស៊ីគូដា។

ការដាក់ឱ្យអនុវត្តសាកល្បងនូវមុខងារបំពេញបែបបទគយមុនពេលទំនិញមក ដល់ (Pre-Arrival Processing) ការដាក់ឱ្យអនុវត្តប្រព័ន្ធវាយតម្លៃហានិភ័យអ្នកដំណើរតាមផ្លូវអាកាស (GTAS) ការដាក់ឱ្យអនុវត្តកម្មវិធីប្រតិបត្តិករសេដ្ឋកិច្ចបានទទួលការអនុញ្ញាត (AEO) និងការអនុវត្តវិធានការលើកទឹកចិត្តផ្នែកគយសម្រាប់សហគ្រាស ធុនតូចនិងមធ្យម (SMEs) ជាដើម។ លើសពីនេះ អ.គ.រ. បានតភ្ជាប់ ប្រព័ន្ធបញ្ជរតែមួយជាតិ ទៅនឹងប្រព័ន្ធបញ្ជរតែមួយរបស់អាស៊ាន (ASW) និងបានចូលរួមអនុវត្តប្រព័ន្ធឆ្លង កាត់គយអាស៊ាន (ACTS) ជាដើម៕

ប្រភពពីសៀវភៅ៖ យុទ្ធសាស្ត្រកៀរគរចំណូល របស់រាជរដ្ឋាភិបាលនីតិកាលទី៧ នៃរដ្ឋសភា