ភ្នំពេញ៖ ក្រសួងពាណិជ្ជកម្ម សម្រេចដាក់ឱ្យអនុវត្តនូវគម្រូទម្រង់លក្ខន្តិកៈក្រុមហ៊ុនថ្មី ដើម្បីចូលរួមកិច្ចសម្រួលពាណិជ្ជកម្ម និងកាត់បន្ថយការប្រើប្រាស់ឯកសារច្រើននៅក្នុងការចុះបញ្ជីពាណិជ្ជកម្ម។ នេះបើតាមសេចក្តីប្រកាសព័ត៌មាន ដែលចេញផ្សាយ កាលពីថ្ងៃទី១០ ខែមេសា ឆ្នាំ២០២៥។

គម្រូទម្រង់លក្ខន្តិកៈក្រុមហ៊ុនថ្មីនេះ នឹងបញ្ចូលនៅក្នុងឧបសម្ព័ន្ធទី១ នៃលក្ខន្តិកៈក្រុមហ៊ុន រួមមាននាមករណ៍ក្រុមហ៊ុន ទ្រង់ទ្រាយ កម្មវត្ថុអាជីវកម្ម អាសយដ្ឋាន ចុះបញ្ជី ដើមទុនចុះបញ្ជី តម្លៃចារឹកលើបណ្ណភាគហ៊ុន ព័ត៌មានម្ចាស់ហ៊ុន និងព័ត៌មានអភិបាល។

តាមរយៈការកែទម្រង់នេះ សាធារណជន និងធុរជនទាំងអស់ នឹងចំណេញពេលវេលាច្រើនចំពោះការ រៀបចំឯកសារស្នើសុំចុះបញ្ជីពាណិជ្ជកម្ម ហើយរាល់ការកែប្រែលក្ខន្តិកៈថ្មីនៅក្រសួងពាណិជ្ជកម្ម គឺតម្រូវឱ្យកែប្រែតែឧបសម្ព័ន្ធទី១ នៃលក្ខន្តិកៈក្រុមហ៊ុនតែប៉ុណ្ណោះ៕