ភ្នំពេញ៖ ក្នុងរយៈពេល ១១ខែនៅឆ្នាំ២០២៣ ក្រសួងពាណិជ្ជកម្ម រកចំណូលសរុបបាន ៥៣ ៥៧៨,១លានរៀល ប្រមាណជា ១៣លានដុល្លារ លើសផែនការច្បាប់កំណត់ចំនួន ២,០៩ភាគរយ។

យោងតាមរបាយការណ៍បូកសរុបលទ្ធផលការងារពាណិជ្ជកម្មឆ្នាំ២០២៣ និងទិសដៅការងារពាណិជ្ជកម្មឆ្នាំ២០២៤ ចំណូលដែលក្រសួងប្រមូលបានពីការផ្តល់វិញ្ញាបនបត្របញ្ជាក់ដើមកំណើតទំនិញមានចំនួន ២៦ ៥១៣ ៨២៧ ៧៦២រៀល ខណៈដែលចំណូលពីការចុះបញ្ជីពាណិជ្ជកម្ម និងសេវាពាក់ព័ន្ធផ្សេងៗមានចំនួន ១៥ ៣៨១ ០៧០ ០០០រៀល។

ចំពោះ ការចុះបញ្ជីម៉ាក និងសេវាពាក់ព័ន្ធផ្សេងៗទទួលបានចំណូលចំនួន ៨ ៤៣៩ ២៨១ ៣២២រៀល, សេវាទាក់ទងនឹងកិច្ចការពិព័រណ៍មានទំហំ ១០៨ ៩០០ ០០០រៀល, តម្កល់លិខិតជូនដំណឹងប្រតិបត្តិការដែលមានការធានាមានចំនួន ៣៣១ ៦៨០ ០០០រៀល, ការផាកពិន័យ និងសេវាផ្សេងៗរបស់អគ្គនាយកដ្ឋានក.ប.ប. សម្រេចបានទឹកប្រាក់ ១ ៦៩១ ៣៦០ ០០០រៀល និងថ្លៃឈ្នួលអចលនទ្រព្យសម្រេចបាន ១ ១១២ ០២៨ ៩៥៩រៀល។ ក្នុងនោះក៏មានចំណូលដែលប្រមូលបានពីការផ្តល់សេវាសាធារណៈ ការផាកពិន័យជាសាច់ប្រាក់ និងចំណូលថ្លៃឈ្នួលអចលនទ្រព្យផងដែរ។

ក្នុងរបាយការណ៍បូកសរុបការងារដដែល ក៏បានបញ្ជាក់ពីការចំណាយរបស់ក្រសួងពាណិជ្ជកម្ម ក្នុងរយៈពេល ១១ខែក្នុងឆ្នាំ២០២៣ផងដែរ ដែលមានចំនួន ៩០ ៤៦៩,៨លានរៀល ប្រមាណជា ២២លានដុល្លារ ស្មើនឹង ៨៧,៧២ភាគរយ នៃឥណទានថវិកាដែលបានផ្តល់ចំនួន ១០៣ ១៤០,០លានរៀល៕