ភ្នំពេញ៖ ធនាគារជាតិនៃកម្ពុជា រៀបចំកម្មវិធីប្រកួតផលិតវីដេអូខ្លី ក្រោមប្រធានបទ៖ តើប្រាក់ ១ម៉ឺនរៀល អាចទិញអ្វីបានខ្លះនៅខេត្តស្ទឹងត្រែង និងខេត្តក្រចេះ ដើម្បីអបអរសាទរខួបលើកទី៤៥ នៃការដាក់ឱ្យចរាចរប្រាក់រៀលឡើងវិញ។ នេះបើតាមការចុះផ្សាយរបស់ ធនាគារជាតិ។

ចំពោះលក្ខខណ្ឌចូលរួម បេក្ខជន ត្រូវថតនៅទីតាំងក្នុងខេត្តស្ទឹងត្រែង និងខេត្តក្រចេះ, វីដេអូត្រូវមានរយៈពេលពី ៤០វិនាទី - ៣នាទី, តាមដាន (Follow) ទំព័រហ្វ៊េសប៊ុកផ្លូវការធនាគារជាតិ និងផ្សព្វផ្សាយវីដេអូនៅលើគណនីហ៊្វេសបុក ឬ Tiktok ផ្ទាល់ខ្លួន ដោយមានភ្ជាប់ចំណងជើង #ទិវាប្រាក់រៀល២០២៥ #ខ្ញុំស្រឡាញ់ប្រាក់រៀល និង #ធនាគារជាតិនៃកម្ពុជា និង mention គណនីបណ្ដាញសង្គមផ្លូវការធនាគារជាតិនៃកម្ពុជា (ធនាគារជាតិ នៃកម្ពុជា - National Bank of Cambodia) និង (@nationalbankofcambodia_នៅលើ Tiktok)។ ជាពិសេស វីដេអូ ត្រូវបង្កប់អត្ថន័យពីសារសំខាន់ ការប្រើប្រាស់ប្រាក់រៀល ឬការប្រើប្រាស់ប្រាក់រៀលតាមបែបឌីជីថល។

ជ័យលាភីលេខ១ ដែលចូលរួមប្រកួត នឹងទទួលបានទឹកប្រាក់ចំនួន ២លានរៀល និងជ័យលាភីលេខ២ ទទួលបានទឹកប្រាក់ចំនួន ១លានរៀល។ សាធារណជន ដែលចូលរួមប្រកួតក្នុងទីតាំងខេត្តស្ទឹងត្រែង ត្រូវផ្ញើតំណភ្ជាប់វីដេអូ ដែលបានផ្សព្វផ្សាយមកក្នុងប្រអប់សារនៃហ្វ៊េសបុកផ្លូវការធនាគារជាតិ ត្រឹមថ្ងៃទី១២ ខែឧសភា និងខេត្តក្រចេះ ត្រឹមថ្ងៃទី៩ ខែឧសភា ឆ្នាំ២០២៥។ ជ័យលាភី នឹងទទួលរង្វាន់នៅក្នុងសិក្ខាសាលាផ្សព្វផ្សាយ ស្តីពី ប្រាក់រៀល ប្រព័ន្ធបាគង និងខេអេចឃ្យូអរ (KHQR) នៅខេត្តស្ទឹងត្រែង នាថ្ងៃទី១៩ ខែឧសភា និងខេត្តក្រចេះ នាថ្ងៃទី១៦ ខែឧសភា៕