ភ្នំពេញ៖ សាច់ជ្រូកចំនួន ៦០០គីឡូក្រាម ដែលគ្មានលិខិតអនុញ្ញាតនាំចូលដោយគ្មានប្រភពច្បាស់លាស់និងដឹកជញ្ជូនមិនត្រឹមត្រូវតាមលក្ខណៈបច្ចេកទ្ទេស ត្រូវបានស្នងការនៃស្នងការដ្ឋាននគរបាលខេត្តបាត់ដំបង, នគរបាលប្រឆាំងបទល្មើសសេដ្ឋកិច្ច និងនាយកដ្ឋានសាខា ក.ប.ប ខេត្តបាត់ដំបង បង្រ្កាបនិងដុតបំផ្លាញចោល កាលពីថ្ងៃទី០៨ ខែឧសភា ឆ្នាំ២០២៥។

សាច់ជ្រូក ដែលខុសលក្ខណៈបច្ចេកទេស និងគ្មានលិខិតអនុញ្ញាតនាំចូលគ្មានប្រភពច្បាស់លាស់នេះ ត្រូវបានមន្ត្រីជំនាញ បង្ក្រាបបាននៅក្នុងរថយន្តមួយគ្រឿង ម៉ាកស៊ីណា ពណ៌ស ឆ្នាំ២០០៤ ពាក់ផ្លាកលេខ ភ្នំពេញ ២AU -៧៩១៨ ដែលស្ថិតនៅចំណុចផ្លូវជាតិលេខ៥ ក្នុងភូមិពុកឆ្មារ ឃុំអន្លង់វិល ស្រុកសង្កែ ខេត្តបាត់ដំបង។

ជាមួយគ្នានេះ ឯកឧត្តម កែវ សុជាតិ ព្រះរាជអាជ្ញានៃអយ្យការអមសាលាដំបូងខេត្តបាត់ដំបង និងលោក ទុត វីនីត ព្រះរាជអាជ្ញារង ដុតបំផ្លាញចោលសាច់ជ្រូកខូចគុណភាព នៅទីលានចាក់សំរាម ស្ថិតនៅភូមិអូរមុនី ឃុំអន្លង់វិល ស្រុកសង្កែ ខេត្តបាត់ដំបង៕