ភ្នំពេញ៖ រដ្ឋបាលខេត្តបាត់ដំបង នឹងរៀបចំកម្មវិធីប៊ូហ្វេទុរេនបាត់ដំបង រយៈពេល ៣ថ្ងៃ គឺចាប់ពីថ្ងៃទី២៧ ដល់ថ្ងៃទី២៩ ខែមិថុនា ឆ្នាំ២០២៥ នៅបរិវេណទីធ្លាមុខសាលាខេត្តបាត់ដំបង។ តាមការចុះផ្សាយរបស់រដ្ឋបាលខេត្តបាត់ដំបង នាថ្ងៃទី១៩ ខែមិថុនា ឆ្នាំ២០២៥ បានឱ្យដឹងថា ភ្ញៀវជាតិ និងអន្តរជាតិ នឹងបានទទួលទានទុរេនស្រុកសំឡូតផ្ទាល់ ១០០% និងផ្លែឈើខេត្តបាត់ដំបងជាច្រើនទៀតផងដែរ។

ជាមួយគ្នានេះ រដ្ឋបាលខេត្តបាត់ដំបង ក៏បានរៀបចំ«ព្រឹត្តិការណ៍ផ្លែឈើបាត់ដំបង ២០២៥» (Battambang Fruits Event 2025) ចាប់ពីថ្ងៃទី២៧ ខែមិថុនា ដល់ថ្ងៃទី០៣ ខែកក្កដា ឆ្នាំ២០២៥ នៅបរិវេណទីធ្លាមុខសាលាខេត្តបាត់ដំបងផងដែរ។ ព្រឹត្តិការណ៍នេះ រៀបចំឡើងដើម្បីតាំងបង្ហាញអំពីផលិតផលផ្លែឈើ ដែលមានក្នុងខេត្តបាត់ដំបង និងដាក់តាំងបង្ហាញផលិតផលផ្សេងៗរបស់អ្នកបាត់ដំបង៕