ភ្នំពេញ៖ ក្រសួងប្រៃសណីយ៍ និងទូរគមនាគមន៍ ប្រកាសថ្កោលទោសយ៉ាងដាច់អហង្ការចំពោះជនអគតិ ដែលយករូបវីដេអូនៃការសំណេះសំណាលរបស់ សម្តេចតេជោ ហ៊ុន សែន ប្រធានព្រឹទ្ធសភា ជាមួយ មន្ត្រីរាជការខេត្តព្រះវិហារ កាលពីថ្ងៃទី២៧ ខែមិថុនា ឆ្នាំ២០២៥ ទៅកាត់តជាមួយសំឡេងក្លែងបន្លំដោយប្រើប្រាស់បញ្ញាសិប្បនិម្មិត។

ក្រសួងប្រៃសណីយ៍ បញ្ជាក់ថា ការបង្កើតវីដេអូក្លែងបន្លំបែបនេះ ជាការបង្កើតព័ត៌មានមិនពិត និងជាអំពើទុច្ចរិត ដែលមិនគួរមានលើបណ្តាញសង្គមឌីជីថលគ្រប់ប្រភេទ ហើយជនបង្ក ត្រូវទទួលខុសត្រូវចំពោះមុខច្បាប់ជាធរមាន។

ពាក់ព័ន្ធនឹងការក្លែងបន្លំនេះ សាធារណជន ត្រូវបង្កើនការប្រុងប្រយ័ត្នខ្ពស់ចំពោះវីដេអូ សំឡេង និងរូបភាពទាំងឡាយ ដែលមានសភាពខុសប្រក្រតី ហើយត្រូវផ្ទៀងផ្ទាត់ដំណឹង ដែលទទួលបានជាមួយនឹងប្រភពផ្លូវការរបស់ក្រសួង ស្ថាប័នរដ្ឋ និងស្ថាប័នសារព័ត៌មានផ្លូវការ។ ក្រសួងប្រៃសណីយ៍ ក៏បានអំពាវនាវដល់គ្រប់ថ្នាលទំនាក់ទំនងឌីជីថល និងអ្នកបង្កើតមាតិកាឌីជីថល ចូលរួមលុបបំបាត់វីដេអូក្លែងបន្លំនេះ និងគ្រប់ព័ត៌មានក្លែងក្លាយ និងចាត់វិធានការម៉ឺងម៉ាត់ចំពោះជន ដែលបានប្រព្រឹត្ត៕