ភ្នំពេញ៖ រដ្ឋបាលខេត្តសៀមរាប បានណែនាំឱ្យស្រុកចំនួន៣ រួមមានស្រុកក្រឡាញ់ ស្រុកពួក និងស្រុកអង្គរជុំ ត្រៀមរៀបចំវេទិកាផ្សព្វផ្សាយ ស្ដីពីឱកាសទទួលបានការងារ និងការបណ្ដុះបណ្ដាលជំនាញវិជ្ជាជីវៈ ដល់ប្រជាពលរដ្ឋ យុវជនក្រុមគោលដៅ ជាពិសេសអ្នកដែលទើបត្រឡប់មកពីប្រទេសថៃ តាមរយៈកិច្ចសហការជាមួយវិទ្យាស្ថានជាតិពហុបច្ចេកទេសអង្គរ វិទ្យាស្ថានពហុបច្ចេកទេសភូមិភាគតេជោសែន និងមជ្ឈមណ្ឌលការងារខេត្ត ក្នុងន័យដើម្បីជំរុញឱកាសការងារ។

លោក ឌី រ៉ាដូ អភិបាលរងខេត្តសៀមរាប បានណែនាំដល់បណ្ដាស្រុកគោលដៅខាងលើ ត្រៀមសហការរៀបចំវេទិកាផ្សព្វផ្សាយពីឱកាសទទួលបានការងារ និងការបណ្ដុះបណ្ដាលជំនាញវិជ្ជាជីវៈ ឱ្យកាន់តែច្បាស់ និងងាយស្រួល ជំរុញអ្នកមានជំនាញឱ្យឆាប់ទទួលបានការងារធ្វើ និងអ្នកដែលចង់ចាប់ជំនាញងាកមកសិក្សាជំនាញមួយដែលច្បាស់លាស់សម្រាប់ជួយដល់សេដ្ឋកិច្ចគ្រួសារ។

លោក ឌី រ៉ាដូ បានឱ្យដឹងថា គិតមកទល់ពេលនេះ អាជ្ញាធរខេត្ត អង្គការដៃគូ រួមនឹងស្ថាប័នផ្សេងៗ ក៏បានត្រៀមខ្លួនរួចជាស្រេចក្នុងការជួយសម្របសម្រួលស្វែងរកការងារ និងផ្ដល់ជំនាញវិជ្ជាជីវៈមួយដែលសមស្រប ជូនដល់ពលករដែលទើបត្រឡប់មកពីក្រៅប្រទេស តាមរយៈការចែកខិត្តប័ណ្ណ និងផ្ដល់ព័ត៌មានការងារជូនពួកគាត់ទាំងនៅច្រកព្រំដែន និងនៅខេត្តសៀមរាប ធ្វើយ៉ាងណាមានភាពងាយស្រួលក្នុងការរកបានការងារពេលមកដល់ស្រុកកំណើតវិញ៕