ភ្នំពេញ៖ រដ្ឋាភិបាលជប៉ុន បានផ្តល់ជំនួយឥតសំណងសម្រាប់ គម្រោងគាំទ្រការស្ថាបនាឡើងវិញជាមួយការបោសសម្អាតគ្រាប់បែកចង្កោមនៅខេត្តស្ទឹងត្រែង ហៅកាត់ថាគម្រោង PRCS ជាមួយអង្គការសកម្មភាពកម្ចាត់មីនជប៉ុន (JMAS) ចំនួន ៦៦៥ ១៨៦ ដុល្លារ។

ឯកឧត្តម អ៊ូអិណុ អាត់ស៊ូស៊ី ឯកអគ្គរាជទូតជប៉ុនប្រចាំកម្ពុជា បានបង្ហាញសង្ឃឹមថា ជំនួយឥតសំណងទាំងនេះ នឹងផ្តល់អត្ថប្រយោជន៍ដល់ប្រជាជនក្នុងតំបន់គោលដៅ តាមរយៈការលើកកម្ពស់សុវត្ថិភាព និងគុណភាពជីវិតរបស់ប្រជាជន។ ឯកឧត្តម អ៊ូអិណុ អាត់ស៊ូស៊ី ក៏បានបន្ថែមថា គម្រោងនេះ នឹងរួមចំណែកដល់ការបោសសម្អាតគ្រាប់បែកចង្កោមយ៉ាងឆាប់រហ័ស និងលើកកម្ពស់សុវត្ថិភាពនៅក្នុងតំបន់ដែលមានគ្រាប់មិនទាន់ផ្ទុះក្នុងប្រទេសកម្ពុជា៕