ភ្នំពេញ៖ ហុងកុង នឹងពិនិត្យលទ្ធភាពវិនិយោគក្នុងវិស័យបច្ចេកវិទ្យា និងកែច្នៃអាហារនៅកម្ពុជា។

បើតាមការលើកឡើងរបស់ លោកបណ្ឌិត Patrick LAU អនុប្រធានប្រតិបត្តិ នៃក្រុមប្រឹក្សាអភិវឌ្ឍន៍ពាណិជ្ជកម្មហុងកុង ការវិនិយោគនេះ ដើម្បីទាញប្រយោជន៍ពីសក្តានុពលនៃកសិផលសំខាន់ៗ ដែលកម្ពុជា ពុំទាន់មានលទ្ធភាពគ្រប់គ្រាន់ក្នុងការកែច្នៃទៅជាផលិតផលសម្រេចដើម្បីនាំចេញ។

ក្នុងជំនួបជាមួយ ឯកឧត្តម សុខ សុភ័ក្ត្រ រដ្ឋលេខាធិការក្រសួងពាណិជ្ជកម្ម ដើម្បីពិភាក្សាជំរុញការវិនិយោគ និងពាណិជ្ជកម្មរវាងកម្ពុជា និងតំបន់រដ្ឋបាលពិសេសហុងកុង កាលពីថ្ងៃទី១៩ ខែមីនា ឆ្នាំ២០២៤ លោកបណ្ឌិត Patrick LAU បានឱ្យដឹងថា កសិផលសំខាន់ៗ ដែលកម្ពុជា ពុំទាន់មានលទ្ធភាពកែច្នៃទៅជាផលិតផលសម្រេចដើម្បីនាំចេញនោះ មានដូចជា ស្វាយចន្ទី កៅស៊ូ និងស្រូវអង្ករ ជាដើម។

ឯកឧត្តមរដ្ឋលេខាធិការ សុខ សុភ័ក្ត្រ បានជម្រាបជូនភាគីហុងកុងអំពីសមិទ្ធផលថ្មីៗរបស់រាជរដ្ឋាភិបាលកម្ពុជា ក្នុងការជំរុញកំណើនវិនិយោគ និងពាណិជ្ជកម្ម, ពិសេសការដាក់ឱ្យអនុវត្តច្បាប់វិនិយោគថ្មី និងបទប្បញ្ញត្តិពាក់ព័ន្ធ, ការសម្រេចបាននូវកិច្ចព្រមព្រៀងពាណិជ្ជកម្មសេរីទ្វេភាគី-ពហុភាគី, គោលនយោបាយនានាក្នុងការគាំទ្រនិងជំរុញឌីជីថលូបនីយកម្ម ព្រមទាំងកម្មវិធីជំរុញការវិនិយោគនៅខេត្តព្រះសីហនុឆ្នាំ២០២៤ផងដែរ។

បើតាមការចុះផ្សាយរបស់ក្រសួងពាណិជ្ជកម្ម កាលពីថ្ងៃ២០ មីនា លោកបណ្ឌិតអនុប្រធានប្រតិបត្តិ Patrick LAU បានប្តេជ្ញានាំយកព័ត៌មានរបស់កម្ពុជាជូនវិនិយោគិន និងធុរជនហុងកុង។ លើសពីនេះ

ភាគីហុងកុង បានសន្យាថានឹងអញ្ជើញវិនិយោគិន និងផលិតករកម្ពុជា មកចូលរួមព្រឹត្តិការណ៍ពិព័រណ៌ វេទិការ សន្និសីទថ្នាក់តំបន់ និងអន្តរជាតិនានា ដែលហុងកុងនឹងរៀបចំ ដើម្បីកម្ពុជាអាចបង្ហាញពីគោលនយោបាយ និងផលិតផលសក្តានុពលទាំងនោះ កាន់តែទូលំទូលាយ និងច្បាស់លាស់៕