ភ្នំពេញ៖ កម្ពុជា មានមហិច្ឆតាចង់កែប្រែឈានចេញពីអ្នកផ្គត់ផ្គង់វត្ថុធាតុដើមកសិកម្ម ទៅជាមជ្ឈមណ្ឌលសម្រាប់ផលិតផលកែច្នៃដែលមានតម្លៃខ្ពស់ តាមរយៈការទាក់ទាញការវិនិយោគបន្ថែមលើការកែច្នៃកសិផល ការផលិតដែលមានភាពធន់នឹងអាកាសធាតុ និងខ្សែច្រវាក់តម្លៃដែលផ្អែកលើស្តង់ដា។ នេះបើតាមការបញ្ជាក់របស់លោកជំទាវ យ៉ើ អាស៊ីគីន អនុរដ្ឋលេខាធិការក្រសួងកសិកម្ម​ រុក្ខាប្រមាញ់​ និងនេសាទ ក្នុងមហាសន្និបាតអង្គការ FAO ប្រចាំតំបន់អាស៊ី និងប៉ាស៊ីហ្វិក (APRC) លើកទី៣៨ នៅប្រទេសព្រុយណេដារូសាឡឹម។

ក្នុងកម្មវិធីនេះ លោកជំទាវ យ៉ើ អាស៊ីគីន បានធ្វើបទបង្ហាញស្តីពីតម្រូវការវិនិយោគ និងឱកាសវិនិយោគលើវិស័យស្រូវអង្ករកម្ពុជា ក្នុងវេទិកាម្ហូបអាហារអាស៊ី-ប៉ាស៊ីហ្វិក (APFF) ជំរុញការវិនិយោគ សម្រាប់ការផ្លាស់ប្តូរប្រព័ន្ធកសិ-ចំណីអាហារ ដោយបង្ហាញពីវឌ្ឍនភាពទំហំផលិតកម្ម ការវិនិយោគ ការជំរុញលើហេដ្ឋារចនាសម្ព័ន្ធកែច្នៃ និងការនាំចេញស្រូវ-អង្ករកម្ពុជាលើឆាកអន្តរជាតិ ក៏ដូចជាការទាក់ទាញ និងបង្កើនការវិនិយោគក្នុងវិស័យកសិកម្មកម្ពុជា។

ជាមួយគ្នានេះ ឯកឧត្តមបណ្ឌិត Qu Dongyu អគ្គនាយកនៃអង្គការ FAO បានបង្ហាញពីការប្តេជ្ញាចិត្តក្នុងការពង្រឹងភាពជាដៃគូឱ្យកាន់តែរឹងមាំ ដោយផ្តោតលើការអភិវឌ្ឍវិស័យកសិកម្មវឌ្ឍនភាពនៃប្រព័ន្ធស្បៀង កសិកម្ម និងការកៀរគរវិនិយោគ ដើម្បីគាំទ្រដល់សន្តិសុខស្បៀង ស្របតាមយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា។ ភាគីទាំងពីរ ក៏បានពិភាក្សាអំពីការត្រៀមរៀបចំ «វេទិកា និងការតាំងពិព័រណ៍កសិកម្មកម្ពុជា ឆ្នាំ២០២៦» ព្រមទាំងការជំរុញគំនិតផ្ដួចផ្ដើមហិរញ្ញប្បទានចម្រុះ ក្នុងគោលដៅពង្រឹងវិស័យជល ផលទឹកសាប វារីវប្បកម្ម និងការលើកកម្ពស់ជីវភាពសហគមន៍ជនបទ ប្រកបដោយនិរន្តរភាព៕