ញូវយ៉ក៖ ក្នុងអំឡុងសម័យប្រជុំលើកទី៨១ នៃមហាសន្និបាតអង្គការសហប្រជាជាតិ នៅទីក្រុងញូវយ៉ក នាថ្ងៃទី២៤ កញ្ញា ២០២៦ ឯកឧត្តម កាន់ ផារិទ្ធ រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ បានអញ្ជើញចូលរួមកិច្ចប្រជុំថ្នាក់រដ្ឋមន្ត្រីនៃ គណៈកម្មាធិការកសាងសន្តិភាព ក្រោមមូលបទ «ភាពជាម្ចាស់ថ្នាក់ជាតិក្នុងការអនុវត្ត៖ ការពង្រឹងស្ថាប័នរដ្ឋប្រកបដោយបរិយាបន្ន តាមរយៈការគាំទ្រការកសាងសន្តិភាពអន្តរជាតិ»។

កិច្ចប្រជុំនេះ ដឹកនាំដោយ ព្រះរាជាណាចក្រម៉ារ៉ុក ក្នុងឋានៈជាប្រធានគណៈកម្មាធិការកសាងសន្តិភាព។ក្នុងបទអន្តរាគមន៍ ឯកឧត្តម កាន់ ផារិទ្ធ បានគូសបញ្ជាក់ចំណុចគន្លឹះចំនួន ៣ រួមមាន៖

១. ភាពជាម្ចាស់ថ្នាក់ជាតិ ការផ្សះផ្សាជាតិ និងអភិបាលកិច្ចប្រកបដោយបរិយាបន្ន គឺជាគ្រឹះមិនអាចខ្វះបាន សម្រាប់សន្តិភាពយូរអង្វែង។

២. ការគាំទ្រការកសាងសន្តិភាពអន្តរជាតិ គួរផ្អែកលើតម្រូវការជាក់ស្តែង មានភាពជាម្ចាស់ថ្នាក់ជាតិ និងស្របតាមអាទិភាពជាតិ។

៣. គណៈកម្មាធិការកសាងសន្តិភាព គួរបន្តទាញយកផលប្រយោជន៍បន្ថែមពីបទពិសោធន៍ចម្រុះ និងចំណុចខ្លាំងរបស់សមាជិកខ្លួន៕