ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា (CDC) បានរៀបចំកិច្ចប្រជុំច្រកចេញចូលតែមួយ ដើម្បីពិនិត្យពិភាក្សាលើសំណើសុំចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់ចំនួន ១២គម្រោង ដែលមានទំហំវិនិយោគប្រមាណ ១៣៥លានដុល្លារ ដែលអាចបង្កើតការងារបានចំនួន ៧ពាន់កន្លែង។ នេះបើតាមការចុះផ្សាយរបស់ CDC នាថ្ងៃទី០៤ ខែកុម្ភៈ ឆ្នាំ២០២៥។

គម្រោងវិនិយោគទាំង១២នេះ មានមុខសញ្ញាវិនិយោគក្នុងវិស័យឧស្សាហកម្មចំនួន ១១គម្រោង ដូចជា៖ ឧបករណ៍បរិក្ខារពេទ្យ, ផ្គុំនិងដំឡើងគ្រឿងអគ្គិសនីសម្រាប់ប្រើប្រាស់ក្នុងផ្ទះ, ការកែច្នៃលោហធាតុ, ផលិតពិល, ផលិតគ្រោងសំណង់ពីលោហធាតុ, ឧបករណ៍ជាងគ្រប់ប្រភេទ, កាត់ដេរ ចាក់សម្លៀកបំពាក់និងជ្រលក់ពណ៌។

ចំពោះ គម្រោងវិនិយោគមួយទៀត មានមុខសញ្ញាវិនិយោគក្នុងវិស័យហេដ្ឋារចនាសម្ព័ន្ធ គឺគម្រោងអភិវឌ្ឍន៍ស្ថានីយផលិតអគ្គិសនី ដើរដោយថាមពលព្រះអាទិត្យ អានុភាព ៣០មេហ្គាវ៉ាត់។ CDC បានឱ្យដឹងថា គម្រោងចំនួន១២ ខាងលើ ត្រូវបានបោះទុនវិនិយោគនៅនៅខេត្តកំពង់ស្ពឺ, ខេត្តតាកែវ, កណ្តាល, កំពត, និងខេត្តកំពង់ឆ្នាំង៕