ភ្នំពេញ៖ ការស្គាល់គ្នាតាមអនឡាញ (online) មិនប្រាកដថា មានសុវត្ថិភាពទេ។ ដើម្បីការពារខ្លួនពីហានិភ័យក្នុងទំនាក់ទំនងលើបណ្ដាញសង្គម កម្ពុជាឆ្ពោះទៅរកឌីជីថល បានប្រាប់ពីវិធីការពារចំនួន៥ ដូចខាងក្រោម៖

១. ជៀសវាងការជួបដោយផ្ទាល់ជាមួយនឹងមនុស្ស ដែលអ្នកស្គាល់តែនៅលើបណ្តាញទំនាក់ទំនងសង្គម និង២. ហាមដាច់ខាត ក្នុងការឱ្យបុគ្គលដែលស្គាល់តែនៅលើបណ្តាញទំនាក់ទំនងសង្គមមកកាន់ផ្ទះអ្នកផ្ទាល់ និង៣. កុំផ្តល់ព័ត៌មានផ្ទាល់ខ្លួន ដូចជាឈ្មោះ អាយុ លេខទូរសព្ទ និងព័ត៌មានពីគណនីធនាគារទៅកាន់បុគ្គលមិនស្គាល់នោះ។

៤. សូមកុំចុចចូលឯកសារ ឬតំណភ្ជាប់ផ្សេងៗ ដែលផ្ញើដោយបុគ្គលទាំងនោះ ជាដាច់ខាត និង៥.ត្រូវប្រាប់ទៅកាន់ឪពុកម្តាយ ឬមនុស្សជិតស្និតរបស់អ្នក បើសិនជាអ្នកមានអារម្មណ៍ថាមិនស្រួលចិត្ត ឬភ័យខ្លាច នៅពេលធ្វើទំនាក់ទំនងជាមួយបុគ្គលទាំងនោះ៕