ភ្នំពេញ៖ ដើម្បីចូលរួមពង្រីក និងលើកកម្ពស់សុខុមាលភាព ដែលគ្របដណ្តប់កិច្ចគាំពារផ្នែកសន្តិសុខសង្គមទៅដល់កម្មករនិយោជិត និងអ្នកសេដ្ឋកិច្ចក្រៅប្រព័ន្ធ ប្រកបដោយសមធម៌ និងបរិយាបន្ន រាជរដ្ឋាភិបាលកម្ពុជា បានដាក់ចេញនូវផែនការប្រតិបត្តិ ស្តីពី យន្តការជំរុញការចុះបញ្ជីក្នុងប្រព័ន្ធសន្តិសុខសង្គម ឆ្នាំ២០២៤-២០២៦ ដែលផែនការនេះកំណត់គោលដៅចម្បងចំនួន២ ដូចខាងក្រោម៖

គោលដៅចម្បងទី១. គឺជំរុញការចូលរួមរបស់តំណាងសហគ្រាស គ្រឹះស្ថាន និងភាគីពាក់ព័ន្ធ ក្នុងនោះមានសមាគម អង្គការជាតិ និងអន្តរជាតិ ដៃគូអភិវឌ្ឍន៍ និងវិស័យឯកជន ក្នុងដំណើរការពាក់ព័ន្ធនឹងការជំរុញការចុះបញ្ជីនិយោជក និងកម្មករនិយោជិតក្នុងប្រព័ន្ធសន្តិសុខសង្គម។ ចំពោះគោលដៅចម្បងទី២. គឺការបង្កើនចំនួនសហគ្រាស គ្រឹះស្ថាន កម្មករនិយោជិត និងអ្នកសេដ្ឋកិច្ចក្រៅប្រព័ន្ធ ឱ្យចុះឈ្មោះក្នុងប្រព័ន្ធ ប.ស.ស. ដោយប្រើប្រាស់នីតិវិធីសាមញ្ញ បត់បែន និងមានប្រសិទ្ធភាព តាមរយៈវិធានការគន្លឹះដែលបានដាក់ចេញ។

តាមរយៈផែនការប្រតិបត្តិស្តីពី យន្តការជំរុញការចុះបញ្ជីក្នុងប្រព័ន្ធសន្តិសុខសង្គម ឆ្នាំ២០២៤-២០២៦ ដែលមានរយៈពេល ២ឆ្នាំនេះ ប.ស.ស. នឹងកើនសមាជិកថ្មី យ៉ាងហោចណាស់ ១,២លាននាក់៕