ភ្នំពេញ៖ ឯកឧត្តម​ ឌិត​ ទីណា​ រដ្ឋមន្រ្តីក្រសួងកសិកម្ម​ រុក្ខាប្រមាញ់​ និងនេសាទ លើកទឹកចិត្តលោក​ Chris Howe នាយកផ្នែកវាយតម្លៃការងារអភិរក្សប្រចាំតំបន់អាសុីអាគ្នេយ៍នៃអង្គការ WWF អន្តរជាតិ បន្តពង្រឹងកិច្ចសហប្រតិបត្តិការ​ និងភាគជាដៃគូរថែមទៀតទាំងការអភិរក្ស​និងអភិវឌ្ឍ ប្រកបដោយប្រសិទ្ធភាព​ និងនិរន្តរភាពសេដ្ឋកិច្ច និងបរិស្ថាន។

ក្នុងជំនួប កាលពីថ្ងៃទី​២៨​ ខែមករា​ ឆ្នាំ២០២៦​ ឯកឧត្តម​ ឌិត​ ទីណា​ បានពិភាក្សាការងារអំពីភាពជាដៃគូ​ ការស្វែងរកការគាំទ្របន្ថែម​ ការគ្រប់គ្រងសហគមន៍នេសាទ​ សហគមន៍ព្រៃឈេី​ រួមជាមួយនឹងការលើកទឹកចិត្តអង្គការ WWF កម្ពុជា​ សំដៅជួយគាំទ្រអភិរក្ស និងអភិវឌ្ឍសហគមន៍ប្រកបដោយចីរភាព។

ឯកឧត្តមរដ្ឋមន្ត្រីក្រសួងកសិកម្ម​ ក៏បានលើកឡើងពីភាពជោគជ័យក្នុងការអភិរក្សធនធានធម្មជាតិ ជាពិសេសការយកចិត្តទុកដាក់ខ្ពស់លេីសត្វផ្សោតទន្លេមេគង្គ​ ដែលជារតនសម្បត្តិរបស់កម្ពុជា និងពិភពលោក​ ជាក់ស្តែងអត្រាស្លាប់សូន្យនៃសត្វផ្សោតក្នុងឆ្នាំ២០២៥៕