ភ្នំពេញ៖ អគ្គនាយករងនៃអគ្គនាយកដ្ឋានជលផល លោក ថាយ សុមុនី និងសហគមន៍នេសាទចំនួន៣ បានចុះព្រលែងកូនក្តាមសេះចំនួន ៥១ម៉ឺនក្បាល ចូលទៅដែនសមុទ្រខេត្តកែប ក្រោមគម្រោង CamAdapt ដែលជាជំហានដ៏សំខាន់មួយក្នុងកិច្ចខិតខំប្រឹងប្រែងរបស់កម្ពុជាក្នុងការស្ដារប្រព័ន្ធអេកូឡូស៊ីសមុទ្រ និងពង្រឹងភាពធន់របស់សហគមន៍នៅតំបន់ឆ្នេរ កាលពីថ្ងៃទី១១ ខែឧសភា ឆ្នាំ២០២៦។ 

សហគមន៍នេសាទចំនួន៣ ដែលចូលរួមនេះ មានដូចជា សហគមន៍ភូមិថ្មី, សហគមន៍អូរក្រសារ និងសហគមន៍កំពង់ត្រឡាច។ ជាមួយគ្នានេះ លោក ថាយ សុមុនី បានលើកឡើងថា ការលែងកូនក្តាមសេះជាងកន្លះលានក្បាលនេះ ជាជំហានមួយក្នុងកិច្ចខិតខំប្រឹងប្រែងរបស់កម្ពុជាក្នុងការស្ដារប្រព័ន្ធអេកូឡូស៊ីសមុទ្រ និងពង្រឹងភាពធន់របស់សហគមន៍នៅតំបន់ឆ្នេរ ដែលក្នុងរយៈពេលពី ៤ ទៅ ៥ ខែខាងមុខ ក្តាមអាចត្រូវបានប្រមូលផលដោយសហគមន៍នេសាទ។

ក្នុងឱកាសនោះ លោក អ៊ុក ជាន តំណាងមកពីសហគមន៍នេសាទកំពង់ត្រឡាច បានបញ្ជាក់ថា ការលែងក្តាមនេះនឹងជួយបង្កើនស្តុកផលនេសាទ និងធ្វើឱ្យប្រព័ន្ធអេកូឡូស៊ីនៅក្នុងសហគមន៍ឱ្យកាន់តែប្រសើរឡើង ដែលនៅពេលចំនួនក្តាមកើនឡើង វាក៏នឹងជួយបង្កើនចំណូលសម្រាប់សមាជិកសហគមន៍ផងដែរ។ លោក ថាយ សុមុនី បានបន្ថែមថា បច្ចុប្បន្នសហគមន៍នេសាទ ក៏កំពុងជំរុញការអនុវត្តនេសាទប្រកបដោយចីរភាព ការការពារជម្រកធម្មជាតិ និងវិធានការអភិរក្សរយៈពេលវែង ដើម្បីគាំទ្រដល់ការស្ដារឡើងវិញនៃជីវចម្រុះតំបន់ឆ្នេរសម្រាប់មនុស្សជំនាន់ក្រោយ៕