ភ្នំពេញ៖ អគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ នឹងរៀបចំការតាំងពិព័រណ៍ «ភូមិកសិផលខ្មែរ» និងវេទិកាពិភាក្សា «រសជាតិកសិផលខ្មែរ» រយៈពេល ០២ថ្ងៃ ចាប់ពីថ្ងៃទី០១-០២ ខែមិថុនា ឆ្នាំ២០២៤។ កម្មវិធីនេះ រៀបចំឡើងដើម្បីផ្សព្វផ្សាយកសិផលខ្មែរដល់សាធារណជន និងផ្តល់ឱកាសឱ្យអ្នកផ្គត់ផ្គង់ និងអ្នកប្រើប្រាស់ មានលទ្ធភាពក្នុងការស្វែងរកទីផ្សារទិញ-លក់ កសិផលខ្មែរកាន់តែទូលំទូលាយ។

ការតាំងពិព័រណ៍ និងវេទិកាពិភាក្សា ដែលនឹងរៀបចំឡើងនៅផ្សារទំនើប ជីប ម៉ុង ២៧១ មេហ្គាម៉ល នឹងមានការចូលរួមពីថ្នាក់ដឹកនាំ និងចុងភៅម្ហូបការផងដែរ។ បើសិនក្រុមហ៊ុននាំចេញ-នាំចូលផលិតផល កសិកម្ម និងអ្នកពាក់ព័ន្ធ មានបំណងចូលរួមក្នុងការតាំងពិព័រណ៍ ឬសាកសួរព័ត៌មានបន្ថែម អាចទំនាក់ទំនងមកអគ្គនាយកដ្ឋានកសិកម្ម ត្រឹមថ្ងៃទី២៨ ខែមេសា ឆ្នាំ២០២៤ តាមរយៈលេខទូរសព្ទ ០១២ ២៧៧ ៥៥៩ និង០១២ ៥១៤ ១៣១។ នេះបើតាមសេចក្តីជូនដំណឹងកាលពីថ្ងៃទី២៦ ខែមេសា ឆ្នាំ២០២៤ របស់ក្រសួងអគ្គនាយកដ្ឋានកសិកម្ម៕