ភ្នំពេញ៖ ឯកឧត្តមបណ្ឌិត យ៉ង សាំងកុមារ លើកទឹកចិត្តឱ្យប្រជាកសិករដែលមានដីស្រែតិចតួច ងាកមកផលិតស្រូវពូជផ្ការំដួល និងសែនក្រអូប ដើម្បីបង្កើនប្រាក់ចំណេញ។ ឯកឧត្តមរដ្ឋលេខាធិកាក្រសួងកសិកម្ម រូបនេះ បានបញ្ជាក់ថា ក្រសួងកំពុងធ្វើការជំរុញឲ្យមន្រ្តីកសិកម្មឃុំ និងនិស្សិតស្ម័គ្រចិត្តចូលរួមយ៉ាងសកម្មជាមួយកសិករ ក្នុងការផលិតពូជសុទ្ធ ដើម្បីកសាងប្រព័ន្ធពូជសុទ្ធឲ្យបានទូទាំងប្រទេស។

ឯកឧត្តមបណ្ឌិត យ៉ង សាំងកុមារ ដែលតែងតែចុះជួបជាមួយនឹងប្រជាកសិករនៅតាមមូលដ្ឋាននានា បានបង្ហោះនៅក្នុងទំព័រហ្វេសប៊ុករបស់ខ្លួន អំពីការជំរុញឱ្យប្រជាកសិករងាកមកផលិតស្រូវពូជផ្ការំដួល និងសែនក្រអូប ដែលអាចនឹងបង្កើនប្រាក់ចំណេញនេះ បានសរសេរថា ស្រែផលិតស្រូវពូជនៅលើដីតូច អាចប្រើកម្លាំងគ្រួសារ និងសហការគ្នាស្ទូងដោយដៃបាន ហើយការស្ទូងដោយម៉ាស៊ីននឹងជួយដោះស្រាយបញ្ហាកម្លាំងពលកម្ម។

បន្ថែមពីនេះ ឯកឧត្តមបណ្ឌិត យ៉ង សាំងកុមារ រដ្ឋលេខាធិកាក្រសួងកសិកម្ម រុក្ខាប្រមាញ់ និងនេសាទ បានបន្ថែមទៀតថា ការផលិតស្រូវពូជផ្ការំដួល និងសែនក្រអូបនៅក្នុងទំហំដីតូចជាលក្ខណគ្រួសារ តែអាចទទួបានទិន្នផលនិងប្រាក់ចំណូលខ្ពស់នោះ គឺប្រើប្រាស់ពូជតិចជាង, កាត់បន្ថយចំណាយលើការបាញ់ថ្នាំស្មៅ, កាត់បន្ថយការប្រើទឹក, ការប្រើជីគីមីតិចជាង និងមានប្រសិទ្ធិភាពជាង, ទិន្នផលខ្ពស់ជាងស្រូវធម្មតា និងស្រូវមានតម្លៃថ្លៃជាងស្រូវធម្មតាទៀតផង៕