ភ្នំពេញ៖ ប្រព័ន្ធទូទាត់បាគង (Bakong) បាននិងកំពុងបំពេញមុខងារកាន់តែសម្បូរបែបដល់អ្នកប្រើប្រាស់។ តាមរយៈមុខងារដ៏ច្រើននេះ បានជំរុញឱ្យមានការប្រើប្រាស់ប្រព័ន្ធនេះកើនឡើងជាបន្តបន្ទាប់ និងរួមចំណែកដល់ការលើកកម្ពស់បរិយាបន្នហិរញ្ញវត្ថុ និងមុខមាត់កម្ពុជានៅលើឆាកអន្តរជាតិផងដែរ។

បើតាមការចុះផ្សាយរបស់ធនាគារជាតិនៃកម្ពុជា នាថ្ងៃទី៦ ខែសីហា ឆ្នាំ២០២៤ ក្នុងឆមាសទី១ ឆ្នាំ២០២៤ ចំនួនប្រតិបត្តិការជាប្រាក់រៀលតាមប្រព័ន្ធបាគងមាន ៧៥,៥លានប្រតិបត្តិការ កើនឡើង ១,៨ដង ធៀបនឹងរយៈពេលដូចគ្នាក្នុងឆ្នាំ២០២៣ ខណៈដែលទំហំប្រតិបត្តិការទឹកប្រាក់ជាប្រាក់រៀលមានចំនួន ៦៤,៩ទ្រីលានរៀល កើនឡើង ១,៤ដង ធៀបនឹងឆ្នាំ២០២៣។

ប្រភពពីធនាគារជាតិដដែល បានឱ្យដឹងថា ក្នុងឆមាសទី១ ឆ្នាំ២០២៤ ចំនួនប្រតិបត្តិការជាប្រាក់ដុល្លារអាម៉េរិកមាន ៩៩,៨លានប្រតិបត្តិការ បានកើនឡើង ១,៣ដង និងមានទំហំទឹកប្រាក់ជាប្រាក់ដុល្លារអាម៉េរិកចំនួន ៣៨,៨ប៊ីលានដុល្លារអាម៉េរិក បានកើនឡើង ១,៣ដង ធៀបនឹងឆមាសទី១ ក្នុងឆ្នាំ២០២៣៕