ភ្នំពេញ៖ ក្រុមហ៊ុន Amru Rice របស់កម្ពុជា និងក្រុមហ៊ុន Stabil Nutrition, LLC របស់សហរដ្ឋអាម៉េរិក បានចុះហត្ថលេខាលើអនុស្សារណៈនៃការយោគយល់គ្នា (MOU) ដើម្បីវិនិយោគបង្កើតរោងចក្រកែច្នៃកន្ទក់សរីរាង្គនៅកម្ពុជា។ នេះបើតាមការចុះផ្សាយរបស់ក្រុមប្រឹក្សាអភិវឌ្ឍន៍កម្ពុជា នាថ្ងៃទី២៥ ខែកញ្ញា ឆ្នាំ២០២៤។

ការចុះMOU នេះ ធ្វើឡើងរវាងឧកញ៉ា សុង សារ៉ន អគ្គនាយកក្រុមហ៊ុន Amru Rice និងលោក Michael Tarrasch ជាម្ចាស់ក្រុមហ៊ុន Stabil Nutrition, LLC នាថ្ងៃទី២៣ ខែកញ្ញា ឆ្នាំ២០២៤។ ការអនុស្សារណៈនេះ នឹងដើរតួនាទីជាមូលដ្ឋានសម្រាប់កិច្ចសហការនាពេលអនាគត ហើយការវិនិយោគបង្កើតរោងចក្រកែច្នៃកន្ទក់សរីរាង្គនៅកម្ពុជានេះ នឹងប្រើប្រាស់គ្រឿងចក្រ និងបច្ចេកទេសរបស់សហរដ្ឋអាម៉េរិក។

គួរបញ្ជាក់ថា ការចុះ MOU នេះ គឺជាការចុះ MOU ទី២ ដែលពាក់ព័ន្ធនឹងវិស័យស្រូវអង្ករ និងបានចុះហត្ថលេខាក្រោមអធិបតីភាព ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ក្នុងដំណើរបេសកកម្មទាក់ទាញ និងជំរុញវិនិយោគនៅសហរដ្ឋអាម៉េរិក៕