ភ្នំពេញ៖ កិច្ចការវិនិយោគ និងពាណិជ្ជកម្ម ជាក្បាលម៉ាស៊ីនជំរុញឱ្យមានការបង្កើតបច្ចេកវិទ្យា ការងារ និងសសរស្តម្ភនៃស្ថិរភាពសេដ្ឋកិច្ច។ នេះជាការលើកឡើងរបស់ ឯកឧត្តម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នៅទីក្រុងសៀមិន ខេត្តហ្វូជៀន ប្រទេសចិន កាលពីថ្ងៃទី៨ ខែកញ្ញា ឆ្នាំ២០២៤។

ឯកឧត្តម ស៊ុន ចាន់ថុល បានជឿជាក់ថា ការវិនិយោគ នឹងធ្វើឱ្យកម្ពុជាអាចកសាងហេដ្ឋារចនាសម្ព័ន្ធតភ្ជាប់ពាសពេញផ្ទៃប្រទេស ទ្រទ្រង់លើភាពរីកចម្រើននៃធុរកិច្ចឧស្សាហកម្ម ដើម្បីកំណើនសេដ្ឋកិច្ចជាតិ ក៏ដូចជាការនាំមកនូវបច្ចេកវិទ្យាថ្មីៗ ដែលនឹងជួយសម្រួលដល់ការរស់នៅផងដែរ។ ឯកឧត្តមឧបនាយករដ្ឋមន្រ្តី ថ្លែងដូច្នេះ ក្នុងពិធីបើក «ពិព័រណ៍អន្តរជាតិចិនលើកទី២៤ សម្រាប់ការវិនិយោគ និងពាណិជ្ជកម្ម» (The 24th China International Fair for Investment and Trade) ឬ (CIFIT លើកទី២៤)។

ឧបនាយករដ្ឋមន្ត្រី ស៊ុន ចាន់ថុល លើកឡើងបន្តថា តាមរយៈពាណិជ្ជកម្ម កម្ពុជាក៏អាចចូលរួមផ្លាស់ប្ដូរកម្លាំងពលកម្ម ដែលអាចបង្កើតការងារ ផ្លាស់ប្តូរជំនាញ បង្កើនចំណងនៃការជឿទុកចិត្ត និងការគោរពគ្នាទៅវិញទៅមករវាងប្រជាជាតិនានានៅលើសកលលោកទៀតផង។ ក្នុងពិព័រណ៍អន្តរជាតិ CIFIT នេះ ឯកឧត្តមឧបនាយករដ្ឋមន្ត្រី ស៊ុន ចាន់ថុល បានបង្ហាញពីទិសដៅរបស់កម្ពុជា ដែលកំពុងស្វែងរកកិច្ចសហប្រតិបត្តិការ និងការវិនិយោគនៅក្នុងវិស័យ ដូចជាបច្ចេកវិទ្យា ថាមពលកកើតឡើងវិញ និងការអភិវឌ្ឍប្រកបដោយចីរភាព។

ពិព័រណ៍អន្តរជាតិ CIFIT ជាព្រឹត្តិការណ៍សម្រាប់ការវិនិយោគ និងពាណិជ្ជកម្ម, បង្ហាញអំពីសារសំខាន់នៃកម្លាំងជំរុញការអភិវឌ្ឍសេដ្ឋកិច្ចពិភពលោក តាមរយៈការលើកកម្ពស់ឱកាសវិនិយោគ និងពាណិជ្ជកម្ម និងបញ្ជាក់ពីតួនាទីនៃកិច្ចសហប្រតិបត្តិការអន្តរជាតិ ក្នុងការជំរុញកំណើនប្រកបដោយចីរភាពផងដែរ។ ព្រឹត្តិការណ៍នេះ រៀបចំឡើងក្រោមអធិបតីភាពឯកឧត្តម He Lifeng ឧបនាយករដ្ឋមន្ត្រី និងជាសមាជិកការិយាល័យនយោបាយ នៃគណៈកម្មាធិការមជ្ឈិមបក្សកុម្មុយនីស្តចិន និងមានការចូលរួមពីថ្នាក់ដឹកនាំធំៗរបស់ចិន, ឥស្សរជនជាន់ខ្ពស់នៃអេមីរ៉ាតអារ៉ាប់រួម, ទីភ្នាក់ងារជំរុញការវិនិយោគបរទេស, អង្គការអន្តរជាតិ, សហគ្រាស និងតំណាងធុរកិច្ចប្រមាណ ៣០ប្រទស ជុំវិញពិភពលោក៕