ភ្នំពេញ៖ ក្រុមហ៊ុន ខមភើស អ៊ែតវើថាយស៊ីង សហការជាមួយដៃគូប្រទេសហូឡង់ (Meijer Realty Partners) និងម៉ាឡេស៊ី (Wegrow Global Sdn. Bhd.) នឹងវិនិយោគលើគម្រោងនាវាទេសចរណ៍ និងកីឡាលើទឹក CAMBODIAN PERFORMANCE POWERSPORTS នៅតំបន់អភិវឌ្ឍន៍កោះនរា។ នេះបើតាមការលើកឡើងរបស់លោកស្រី ណេង ស៊ីណាត ស្ថាបនិកក្រុមហ៊ុន ខមភើស អ៊ែតវើថាយស៊ីង។

ដើម្បីចូលរួមចំណែកពង្រឹង ពង្រីក និងអភិវឌ្ឍន៍វិស័យទេសចរណ៍នៅកម្ពុជា ក្នុងជំនួបជាមួយឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ លោកស្រី ណេង ស៊ីណាត ក៏បានស្នើសុំអនុសាសន៍ពីគម្រោងវិនិយោគរួមគ្នាលើសួនកម្សាន្តទេសចរណ៍បែបអប់រំ និងវិទ្យាសាស្រ្ត (Theme park)។ បើតាមការចុះផ្សាយរបស់ក្រសួងទេសចរណ៍ កិច្ចពិភាក្សារវាងភាគីរដ្ឋ និងឯកជននេះ ធ្វើឡើងកាលពីទី២៦ ខែតុលា ឆ្នាំ២០២៤ នៅទីស្តីការក្រសួងទេសចរណ៍៕