ភ្នំពេញ៖ អ្នកជាប់ពន្ធ នឹងទទួលបានការបន្ធូរបន្ថយអត្រាពន្ធកាត់ទុកលើ ការប្រាក់ ពី១៤% មក ១០% ឬលើកលែងពន្ធ តាមរយៈកិច្ចព្រមព្រៀង ស្តីពីការចៀសវាងការយកពន្ធត្រួតគ្នា (Double Taxation Agreement-DTA)។ នេះបើតាមព្រឹត្តិបត្រព័ត៌មានប្រចាំសប្តាហ៍ លេខៈ៩០ របស់អគ្គនាយកដ្ឋានពន្ធដារ ចេញផ្សាយនាថ្ងៃទី១៩ ខែធ្នូ ឆ្នាំ២០២៤។

កិច្ចព្រមព្រៀង ស្តីពីការចៀសវាងការយកពន្ធត្រួតគ្នា អ្នកជាប់ពន្ធ ក៏នឹងទទួលបានការបន្ធូរបន្ថយអត្រាពន្ធកាត់ទុកលើ សួយសារ កម្រៃសេវាបច្ចេកទេស និងភាគលាភ ពី១៤% មក ១០%, ការបន្ធូរបន្ថយពន្ធលើបណ្តាប្រភេទពន្ធទាក់ទិននឹងប្រាក់ចំណូល ដែលទទួលបានពីប្រតិបត្តិការនៃនាវា ឬទូក ឬតាមផ្លូវដែក ឬផ្លូវគោកក្នុងចរាចរណ៍អន្តរជាតិក្រោម DTA មក ៥០%។ ជាមួយគ្នានេះ អ្នកជាប់ពន្ធ នឹងទទួលបានការលើកលែងពន្ធលើបណ្តាប្រភេទពន្ធទាក់ទិននឹងប្រាក់ចំណូល ដែលទទួលបានពីប្រតិបត្តិការនៃយន្តហោះ ក្នុងចរាចរណ៍ អន្តរជាតិ ក្រោម DTA និងឥណទានពន្ធលើបណ្តាប្រភេទពន្ធ ដែលបានបង់នៅប្រទេសប្រភពពីប្រទេសនិវាសនដ្ឋានរបស់អ្នកជាប់ពន្ធ។

សម្រាប់ជានីតិវិធីអនុវត្ត អ្នកជាប់ពន្ធជានីតិបុគ្គល ឬរូបវន្តបុគ្គល ត្រូវដាក់ពាក្យស្នើសុំមកអគ្គនាយកដ្ឋានពន្ធដារ ដើម្បីពិនិត្យលក្ខណៈសម្បត្តិក្នុងការទទួលបានអត្ថប្រយោជន៍ក្រោម DTA ដោយភ្ជាប់មកជាមួយនូវឯកសារ ក្នុងនោះនីតិបុគ្គលត្រូវភ្ជាប់៖ ១. វិញ្ញាបនបត្រនិវាសនជន (Certificate of Residence) ច្បាប់ដើម, ២. វិញ្ញាបនបត្រចុះបញ្ជីក្រុមហ៊ុនដើម (Certificate of Incorporation) ថតចម្លង និងមានបញ្ជាក់, ៣. លក្ខន្តិកៈក្រុមហ៊ុន (Company Statute) ថតចម្លង និងមានបញ្ជាក់, ៤. កិច្ចសន្យា/ឯកសារពាក់ព័ន្ធនឹងការទូទាត់ (Document related to income payment) ថតចម្លង និងមានបញ្ជាក់, ៥. លិខិតផ្ទេរសិទ្ធិ (Authorization Letter) ច្បាប់ដើម, ៦. បណ្ណពន្ធប៉ាតង់របស់សហគ្រាសក្នុងស្រុក (អ្នកទូទាត់) (Patent Tax) ថតចម្លង។

ចំណែក រូបវន្តបុគ្គលវិញ ត្រូវភ្ជាប់នូវ៖ ១. អត្តសញ្ញាណប័ណ្ណ/លិខិតឆ្លងដែន (Identification Card/Passport) ថតចម្លង និងមានបញ្ជាក់, ២. វិញ្ញាបនបត្រនិវាសនជន (Certificate of Residence) ច្បាប់ដើម, ៣. កិច្ចសន្យា/ឯកសារពាក់ព័ន្ធនឹងការទូទាត់ (Document related to income payment) ថតចម្លង និងមានបញ្ជាក់, ៤. លិខិតផ្ទេរសិទ្ធិ (Authorization Letter) ច្បាប់ដើមនិង៥. បណ្ណពន្ធប៉ាតង់របស់សហគ្រាសក្នុងស្រុក (អ្នកទូទាត់) (Patent Tax) ថតចម្លង៕