ភ្នំពេញ៖ កម្ពុជា នឹងពង្រីកសក្តានុពលនៃការនាំចេញគ្រាប់ស្វាយចន្ទីទៅកាន់ទីផ្សារជប៉ុន និងការសិក្សាពីយុទ្ធសាស្ត្រ ស្ដីពីការពង្រីកទីផ្សារ តាមរយៈក្រុមហ៊ុន Inoue Calcium Corporation ដែលទទួលគ្រាប់ស្វាយចន្ទី (trial shipment ) ជាលើកដំបូងពីសិប្បកម្មស្វាយចន្ទីស្ទឹងត្រែង។ នេះបើតាមការចុះផ្សាយរបស់ក្រសួងពាណិជ្ជកម្ម កាលពីថ្ងៃទី២១ ខែមករា ឆ្នាំ២០២៥។

ក្នុងកិច្ចពិភាក្សាអំពីការផ្តោតលើការនាំចេញគ្រាប់ស្វាយចន្ទីនេះ ក្រុមការងារជំរុញការនាំចេញ នៃក្រសួងពាណិជ្ជកម្ម ក៏បានបញ្ជាក់ពីការប្តេជ្ញាចិត្តក្នុងការផ្តល់ការគាំទ្រយ៉ាងសកម្ម ដើម្បីបង្កើនឱកាសពាណិជ្ជកម្ម និងការជំរុញភាពជាដៃគូ ក្នុងការជំរុញកំណើនសេដ្ឋកិច្ចប្រកបដោយចីរភាពសម្រាប់ផលិតផលកសិកម្មរបស់កម្ពុជា ជាពិសេសវិស័យនាំចេញគ្រាប់ស្វាយចន្ទី។

ក្នុងកិច្ចពិភាក្សាដែលផ្តោតសំខាន់លើការពង្រីកសក្តានុពលនាំចេញគ្រាប់ស្វាយចន្ទីរបស់កម្ពុជានេះ គឺមានការចូលរួមពីឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម និងជាប្រធានក្រុមការងារជំរុញការនាំចេញ ជាមួយលោក Takashi Inoue នាយកប្រតិបត្តិក្រុមហ៊ុន Inoue Calcium Corporation និងកញ្ញា សឿន សុធីតា ដែលជាសហស្ថាបនិកសិប្បកម្មស្វាយចន្ទីស្ទឹងត្រែង៕