ភ្នំពេញ៖ ផ្សារមូលបត្រកម្ពុជា (CSX) បានបញ្ជាក់ថា មិនមានអ្នកណាអាចកំណត់ថាតម្លៃភាគហ៊ុនថ្ងៃស្អែក ឬខានស្អែកនឹងកើន ឬធ្លាក់នោះទេ ប៉ុន្តែអ្វីដែលយើងដឹងនឹងអាចប្រាប់បាននោះ គឺក្នុងរយៈពេលវែង (ច្រើនឆ្នាំ) ទីផ្សារ និងថ្លៃភាគហ៊ុននឹងកើនឡើង ចំពោះក្រុមហ៊ុនដែលរកស៊ីចំណេញ។

តាមការចុះផ្សាយរបស់ CSX នាថ្ងៃទី៣០ ខែមករា ឆ្នាំ២០២៥ ពេលវេលាល្អបំផុតក្នុងការទិញភាគហ៊ុន គឺទិញជារឿយៗ បើទោះបីភាគហ៊ុនថ្លៃធ្លាក់ចុះ ឬឡើងក៏ដោយ! (Dollar-cost averaging)។ បើតាមរយៈការវិនិយោគទៀងទាត់ គឺជាប្រចាំសប្ដាហ៍ ឬខែ វិនិយោគិនអាចកាត់បន្ថយហានិភ័យ និងទទួលបានអត្ថប្រយោជន៍ពីកំណើនទីផ្សាររយៈពេលវែង។

CSX បានបន្ថែមថា កុំរង់ចាំទីផ្សារល្អ កុំខ្លាចទីផ្សារមិនល្អ គឺវិនិយោគិន ត្រូវវិនិយោគកាន់តែឆាប់ និងញឹកញាប់កាន់តែល្អ។ ចាប់ផ្តើមឥឡូវនេះ វិនិយោគទៀងទាត់ ហើយទុកអោយពេលវេលាជាអ្នកធ្វើការ ដែលវិនិយោគិនអាចសិក្សាស្វែងយល់បន្ថែម ដើម្បីអាចទិញបានក្នុងថ្លៃល្អៗផងដែរ៕