ភ្នំពេញ៖ រដ្ឋាភិបាលជប៉ុន ផ្តល់ថវិកាសរុប ១,៣៩០,១១៧ដុល្លារអាម៉េរិក ដល់អង្គការសកម្មភាពកំចាត់មីនជប៉ុន (JMAS) សម្រាប់អនុវត្តគម្រោងបោសសម្អាតគ្រាប់មីនមិនទាន់ផ្ទុះ នៅក្នុងខេត្តស្ទឹងត្រែង និងខេត្តបន្ទាយមានជ័យ។

ការផ្តល់ជំនួយដល់អង្គការ JMAS នេះ ស្ថានទូតជប៉ុនប្រចាំនៅកម្ពុជា ឱ្យដឹងថា ស្ថិតនៅក្រោមគម្រោង ជំនួយឥតសំណងសម្រាប់គម្រោងអង្គការក្រៅរដ្ឋាភិបាលរបស់ជប៉ុន ដើម្បីអនុវត្តគម្រោងចំនួន២។ ទី១៖ «គម្រោងគាំទ្រការស្ថាបនាឡើងវិញ ជាមួយការបោសសម្អាតគ្រាប់បែកចង្កោមនៅខេត្តស្ទឹងត្រែង ហៅកាត់ថាគម្រោង RSCS (ឆ្នាំទី៣)» និងទី២៖«គម្រោងគាំទ្រការស្ថាបនាឡើងវិញជាមួយការបោសសម្អាតមីននៅខេត្តបន្ទាយមានជ័យ ហៅកាត់ថាគម្រោង RSDB (ឆ្នាំទី៣)»។ 

បើតាមការឱ្យដឹងពីស្ថានទូតជប៉ុនប្រចាំនៅកម្ពុជា នៅថ្ងៃទី១៩ ធ្នូម្សិលមិញ ឯកឧត្តម អ៊ូអិណុ អាត់ស៊ូស៊ី ឯកអគ្គរាជទូតជប៉ុន និងអ្នកតំណាងអង្គការ JMAS បានចុះហត្ថលេខាលើកិច្ចសន្យាផ្តល់ជំនួយឥតសំណងនេះ ដោយភាគីទាំងពីរជឿជាក់ថា ជំនួយឥតសំណងនេះ នឹងកែលម្អគុណភាពជីវិតរបស់ប្រជាជន ដែលរស់នៅក្នុងទីតាំងគម្រោង៕