ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ នឹងរៀបចំ «ពិព័រណ៍ការងារ និងមគ្គទេសក៍អាជីព ឆ្នាំ២០២៥» រយៈពេល ២ថ្ងៃ គឺនៅថ្ងៃទី៩-១០ ខែឧសភា ឆ្នាំ២០២៥ ដើម្បីផ្តល់ភាពងាយស្រួលដល់យុវជន ក៏ដូចជានិយោជក ក្នុងការដាក់ពាក្យចូលបម្រើការងារ។ ពិព័រណ៍ការងារនេះ នឹងប្រព្រឹត្តទៅនៅម៉ោង ៨:០០នាទីព្រឹក ដល់ម៉ោង ១៧:០០នាទីល្ងាច នៅអគារអង្គរវត្ត នៃវិទ្យាស្ថានជាតិបណ្តុះបណ្តាលបច្ចេកទេស (NTTI)។

ពិព័រណ៍ការងារ និងមគ្គទេសក៍អាជីព ឆ្នាំ២០២៥នេះ ត្រូវបានសហការដោយទីភ្នាក់ងារជាតិមុខរបរ និងការងារ(NEA) នៃក្រសួងការងារ ជាមួយសហភាពសហព័ន្ធយុវជនកម្ពុជា(ស.ស.យ.ក) រាជធានីភ្នំពេញ និងសភាពាណិជ្ជកម្មកម្ពុជា-អ៊ីស្រាអ៊ែល ព្រមទាំងមានក្រុមហ៊ុន សហគ្រាស គ្រឹះស្ថាន និងគ្រឹះស្ថានអប់រំបណ្តុះបណ្តាលធំៗ ចូលរួមក្នុងការតាំងបង្ហាញពីតម្រូវការជ្រើសរើសកម្លាំងពលកម្ម កម្មសិក្សាការងារ និងផ្សព្វផ្សាយនូវកម្មវិធីសិក្សា និងកម្មវិធីអភិវឌ្ឍជំនាញគ្រប់ប្រភេទផងដែរ។

សម្រាប់ព័ត៌មានបន្ថែម យុវជន ក៏ដូចជានិយោជក និងសាធារណជន អាចទំនាក់ទំនងទៅកាន់ NEA នៃក្រសួងការងារ តាមរយៈលេខទូរសព្ទ ០១៧ ៤៦៧ ៤២៣ / ០១៧ ៨៧១ ៨០៧។ អាស្រ័យហេតុនេះ ក្រសួងការងារ បានជំរុញឱ្យគ្រប់ក្រសួង ស្ថាប័ន ក្រុមហ៊ុន សហគ្រាស គ្រឹះស្ថាន អង្គការជាតិ អន្តរជាតិ សិស្ស និស្សិត អ្នកស្វែងរកការងារ និងសាធារណជន ចូលរួមឱ្យបានច្រើនកុះករ៕