ភ្នំពេញ៖ ក្រុមហ៊ុន SUNJIN Engineering & Architecture របស់កូរ៉េដ៏ធំមួយ និងបង្កើតឡើងតាំងពីឆ្នាំ១៩៧៥ ចាប់អាម្មរណ៍លើកាលានុវត្តភាពវិនិយោគលើហេដ្ឋារចនាសម្ព័ន្ធទេសចរណ៍។ នេះបើតាមការចុះផ្សាយរបស់ក្រសួងទេសចរណ៍ កាលពីថ្ងៃទី០៧ ខែមិថុនា ឆ្នាំ២០២៥។

ក្នុងជំនួបជាមួយលោក Jong Jin Choi ប្រធានក្រុមហ៊ុន SUNJIN Engineering & Architecture ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ បានបញ្ជាក់អំពីអំពីស្ថានភាពនយោបាយ សេដ្ឋកិច្ច សន្តិសុខសង្គម និងសណ្តាប់ធ្នាប់សាធារណៈដ៏ល្អប្រពៃ ការអភិវឌ្ឍលើគ្រប់វិស័យ កំណើនសេដ្ឋកិច្ច និងទេសចរជាលំដាប់ពីមួយឆ្នាំទៅមួយឆ្នាំដែលកម្ពុជាមាននាពេលបច្ចុប្បន្ន ក៏ដូចជាការធានានូវសុខសុវត្ថិភាពជូនដល់អ្នកទេសចរ និងវនិយោគិនអន្តរជាតិរបស់រាជរដ្ឋាភិបាលកម្ពុជាពិសេសយន្តការលើកទឹកចិត្តពិសេសៗ របស់រដ្ឋាភិបាលកម្ពុជាដល់វិនិយោគិន។

ជាមួយគ្នានេះ រដ្ឋមន្រ្តីក្រសួងទេសចរណ៍ បានបន្ថែមថា ក្រសួងទេសចរណ៍ ស្វាគមន៍កក់ក្តៅដល់ការមកទស្សនកិច្ចរបស់ក្រុមហ៊ុននៅប្រទេសកម្ពុជា ដើម្បីស្វែងយល់ពីកាលានុវត្តភាពវិនិយោគក្នុងវិស័យទេសចរណ៍នាពេលខាងមុខ៕