ភ្នំពេញ៖ សាធារណរដ្ឋឆែក នឹងបន្តគំាទ្រដល់ការអភិវឌ្ឍរបស់កម្ពុជា តារយៈជំរុញកិច្ចសហប្រតិបត្តិការលើវិស័យសុខាភិបាល ពាណិជ្ជកម្ម និងទេសចរណ៍ ព្រមទាំងការពង្រីកផ្តល់អាហារូបករណ៍ដល់និស្សិតកម្ពុជា ទៅសិក្សានៅប្រទេសឆែកបន្ថែមទៀត។ នេះបើតាមការលើកឡើងរបស់ឯកឧត្តម ម៉ាទីន វ៉ាវរ៉ា ឯកអគ្គរដ្ឋទូត នៃសាធារណរដ្ឋឆែកប្រចាំកម្ពុជា។

ក្នុងជំនួបជាមួយឯកឧត្តម ម៉ាទីន វ៉ាវរ៉ា សម្តេចរដ្ឋសភាធិការធិបតី ឃួន សុដារី ប្រធានរដ្ឋសភានៃប្រទេសកម្ពុជា បានវាយតម្លៃខ្ពស់ចំពោះសមិទ្ធផល និងជោគជ័យនានា ដែលឯកអគ្គរដ្ឋទូតបានសម្រេចនៅក្នុងបេសកម្មការទូតនៃប្រទេសទាំងពីរ ដែលបានចូលរួមដល់ចំណងទំនាក់ទំនង កាន់តែមានរឹងមាំ បន្តលូតលាស់ ស៊ីជម្រៅដែលបាននាំមកនូវផលប្រយោជន៍ដល់ប្រទេស និងប្រជាជន។

សម្តេច ឃួន សុដារី បន្ថែមថា តាមរយៈការផ្តល់ជំនួយគាំទ្រដល់កម្ពុជា ចាប់តាំងពីពេលដែលកម្ពុជាទើបបានរំដោះចេញពីរបបប្រល័យពូជសាសន៍ខ្មែរក្រហម បានជួយដល់កម្ពុជាក្នុងពេលវេលាដ៏លំបាកបំផុត។ បន្ថែមលើនេះ រដ្ឋាភិបាលឆែក ក៏បានបង្វែរបំណុលពីអតីតកាលរបស់កម្ពុជា មកជាជំនួយសង្គម ជួយដល់ពលរដ្ឋខ្មែរលើវិស័យសង្គមកិច្ច សុខភាព អប់រំ។ ទន្ទឹមនឹងនេះ សម្តេច ឃួន សុដារី បានបន្ថែមថា កម្ពុជាចង់ឃើញប្រទេសផ្សេងទៀតយកគំរូតាមសាធារណរដ្ឋឆែក ក្នុងការលុបចោល ឬបង្វែរបំណុលដែលកម្ពុជាជំពាក់ មកជាជំនួយអភិវឌ្ឍន៍៕