ភ្នំពេញ៖ លោក Mei Jiaxiang ស្ថាបនិកក្លឹបក្បាច់គុន Emei-Legend នៃខេត្តស៊ីឈាន់ ប្រទេសចិន និងឯកឧត្តម ខូវ ឆាយ ប្រធានសហព័ន្ធកីឡាប្រដាល់គុនខ្មែរ សហការជាមួយក្រសួងទេសចរណ៍ ដើម្បីបង្កើតព្រឹត្តិការណ៍កីឡាប្រដាល់ធំៗជាលក្ខណៈអន្តរជាតិ សម្រាប់ផ្សារភ្ជាប់វិស័យទេសចរណ៍រវាងកម្ពុជា និងចិន។

ក្នុងជំនួបពិភាក្សាការងារកាលពីថ្ងៃទី៧ ខែកក្កដា ឆ្នាំ២០២៥ នេះ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ បានវាយតម្លៃខ្ពស់ចំពោះគំនិតផ្តួចផ្តើម និងគម្រោងដ៏ល្អរបស់ស្ថាប័នទាំងពីរដែលបានសម្លឹងមើលឃើញពីសក្តានុពលទេសចរណ៍ដ៏សំបូរបែប និងកាលានុវត្តវិនិយោគរបស់កម្ពុជា តាមរយៈការផ្សារភា្ជប់កីឡាប្រដាល់ ដែលជួយផ្សព្វផ្សាយពីគុនខ្មែរ-ល្បុក្កតោដល់ប្រជាជនចិន និងពិភពលោក ក៏ដូចជានាំពិភពលោកមកកាន់ប្រទេសកម្ពុជាតាមរយៈគុនខ្មែរ-ល្បុក្កតោផងដែរ៕