ភ្នំពេញ៖ ធនាគារអភិវឌ្ឍន៍ជនបទនិងកសិកម្ម(ARDB) និងធនាគារពាណិជ្ជកម្មក្រៅប្រទេសនៃកម្ពុជា(FTB) រួមគ្នាជាមួយក្រសួងកសិកម្ម រុក្ខាប្រមាញ់ និងនេសាទ ដើម្បីត្រៀមកញ្ចប់ថវិកាពិសេសសម្រាប់ផ្តល់កម្ចីឥណទានការប្រាក់ទាបដល់ «សហគមន៍កសិកម្មទំនើប» ដោយមានការធានាឥណទានពីសាជីវកម្មធានាឥណទានកម្ពុជា(CGCC)។

កិច្ចព្រមព្រៀងដែលត្រូវបានរៀបចំឡើងតាមរយៈអនុស្សរណៈនៃការយោគយល់គ្នា(MoU) ដែលមានការចូលរួមពីឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នេះ នឹងជួយបង្កើនល្បឿនដល់ការពង្រីកវិសាលភាពនៃការអនុវត្តកម្មវិធីគោលនយោបាយអាទិភាព និងបើកផ្លូវឱ្យសហគមន៍កសិកម្មទំនើបអាចមានទុនគ្រប់គ្រាន់ក្នុងការគាំទ្រដល់ប្រតិបត្តិការរបស់ខ្លួនបានពេញលេញ។

បើតាមផែនការគ្រោងទុក ក្រសួងកសិកម្មនឹងត្រូវការទុនក្រោមរូបភាពជាកម្ចីការប្រាក់ទាបយ៉ាងហោចណាស់ ៥០លានដុល្លារ នៅក្នុងរយៈពេល៣ឆ្នាំខាងមុខ ដើម្បីគាំទ្រដល់កម្មវិធីគោលនយោបាយអាទិភាពនៃសហគមន៍កសិកម្មទំនើប ហើយរហូតមកដល់ពេលនេះ មានធនាគារដៃគូចំនួន៣រួចហើយ ដែលកំពុងគាំទ្រដល់សហគមន៍កសិកម្មទំនើប ស្របពេលដែលធនាគារឯកជនចំនួន២ផ្សេងទៀត កំពុងស្ថិតនៅក្នុងដំណាក់កាលរៀបចំគាំទ្របន្ថែមទៀតផងដែរ៕