ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រី សម្រេចលើកលែងពិន័យអន្តរការណ៍ជាប្រាក់ចំពោះការហួសសុពលភាពអាជ្ញាបណ្ណទេសចរណ៍គ្រប់ប្រភេទ លើកលែងអាជ្ញាបណ្ណមគ្គុទ្ទេសក៍ទេសចរណ៍ រហូតដល់ថ្ងៃទី៣០ ខែកញ្ញា ឆ្នាំ២០២៥។

បើតាមសេចក្តីជូនដំណឹងរបស់ ក្រសួងទេសចរណ៍ ការលើកលែងពិន័យអន្តរការណ៍នេះ ធ្វើឡើងក្នុងគោលបំណងបង្កើតជាយន្តការលើកទឹកចិត្តដល់អាជីវកម្មទេសចរណ៍ទាំងអស់ ក្នុងរដូវកាលបៃតង និងចូលរួមកាត់បន្ថយបន្ទុកអនុលោមភាពអាជីវកម្មទេសចរណ៍។

ក្រសួងទេសចរណ៍ បញ្ជាក់ថា អាជីវកម្មទេសចរណ៍គ្រប់ប្រភេទ ដែលមានអាជ្ញាបណ្ណទេសចរណ៍ហួសសុពលភាព ត្រូវរួសរាន់មកដាក់ពាក្យស្នើសុំបន្តអាជ្ញាបណ្ណទេសចរណ៍នៅក្រសួងទេសចរណ៍ ឬមន្ទីរទេសចរណ៍រាជធានី ខេត្ត។ ចំពោះព័ត៌មានបន្ថែម អាចទំនាក់ទំនងទូរសព្ទលេខ ១២២១ រៀងរាល់ម៉ោងធ្វើការ៕