ភ្នំពេញ៖ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ស្នើធនាគារអភិវឌ្ឍន៍អាស៊ី (ADB) គាំទ្រសហគ្រិនខ្មែរក្នុងការពង្រីកសក្តានុពលសហគ្រាសធុនមីក្រូ តូច និងមធ្យម (SME) និងធុរកិច្ចបង្កើតថ្មី។

ជាមួយគ្នានេះ ឯកឧត្តម ហែម វណ្ណឌី ក៏បានស្នើឱ្យADB ឱ្យពង្រីកកិច្ចសហការដោយគាំទ្រលើការពង្រឹងហេដ្ឋារចនាសម្ព័ន្ធគុណភាពជាតិ ជាពិសេសមន្ទីរពិសោធន៍នៅកម្ពុជា, លើកកម្ពស់ផលិតភាពជាតិដើម្បីជំរុញភាពប្រកួតប្រជែងនៃឧស្សាហកម្ម និងគាំទ្រដល់ការរៀបចំ និងកែទម្រង់ច្បាប់ និងបទប្បញ្ញត្តិរបស់ក្រសួង។

លើសពីនេះ គណៈប្រតិភូ ADB បានស្វាគមន៍សំណើទាំងនេះ ដែលផ្តល់នូវភាពច្បាស់លាស់សម្រាប់ការរៀបចំ និងកែលម្អកម្មវិធីអនាគតរបស់ខ្លួន ហើយបានបញ្ជាក់ថា ADB ត្រៀមខ្លួនសហការជាមួយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងរាជរដ្ឋាភិបាលកម្ពុជា ដើម្បីជំរុញការអនុវត្តគំនិតផ្តួចផ្តើមទាំងនេះ៕