ភ្នំពេញ៖ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ជំរុញឱ្យសមាគមសហគ្រិនសកល ១ភាគរយ ពង្រឹងការរួមចំណែកកសាងសហគ្រាសចន្លោះកណ្តាល (missing middle) ដែលអាចយឹតយោងអាជីវកម្មខ្នាតតូច និងចាប់យកឱកាសផ្ពក់ចូលក្នុងខ្សែច្រវាក់តម្លៃរបស់សហគ្រាសខ្នាតធំ។

ក្នុងកិច្ចពិភាក្សាជាមួយ ហៀង វុទ្ធា ប្រធានសមាគមសហគ្រិនសកល ១ភាគរយ ឯកឧត្តមរដ្ឋមន្ត្រីឧស្សាហកម្ម បានលើកទឹកចិត្តឱ្យសមាគមសហគ្រិនសកល ១ភាគរយ ចូលរួមលើកកម្ពស់អនុលោមភាព ពង្រឹងសហគ្រិនភាព កសាងសមត្ថភាពសមាជិករបស់ខ្លួន ដូចជាពាន់ព័ន្ធនឹងស្តង់ដារ និងការនាំចេញ ព្រមទាំងពង្រឹងសមាជិកភាពដោយផ្អែកលើមូលដ្ឋាននៃក្រមសីលធម៌អាជីវកម្ម វិន័យ និងវិធានរបស់សមាគម។ ឯកឧត្តម ហែម វណ្ណឌី លើកឡើងដូច្នេះថា៖ «កម្ពុជា មានសមាគមធុរកិច្ចជាច្រើន ប៉ុន្តែសមាគមដែលមានប្រសិទ្ធភាព គឺសមាគមដែលផ្តល់អត្ថប្រយោជន៍ពិតប្រាកដដល់សមាជិករបស់ខ្លួន»។

លោក ហៀង វុទ្ធា បានទទួលយកអនុសាសន៍ណែនាំទាំងនេះ និងបង្ហាញចំណាប់អារម្មណ៍របស់សមាគមក្នុងការចូលរួមពង្រឹងសមត្ថភាពផលិតក្នុងស្រុក ពិសេសដើម្បីជំនួសទំនិញនាំចូល។ លោក ហៀង វុទ្ធា ក៏បានបង្ហាញអំពីសមាគម ដែលបច្ចុប្បន្នមានសមាជិកជាង ១.២៥០ គ្រប់គ្រងអាជីវកម្មជាង ៤.០០០ មូលដ្ឋាន និងបានរាយការណ៍អំពីសកម្មភាពសមាគម រួមមានការរៀបចំកម្មវិធីកសាងបណ្តាញធុរកិច្ច ដំណើរទស្សនកិច្ចអាជីវកម្ម កម្មវិធីអភិវឌ្ឍន៍សមត្ថភាព និងគំនិតផ្តួចផ្តើមសង្គម ព្រមទាំងសកម្មភាព និងភាពជាដៃគូអន្តរជាតិ ដែលបានផ្តល់អត្ថប្រយោជន៍ដល់ក្រុមហ៊ុនប្រមាណ ៤.៩០០៕