ភ្នំពេញ៖ ឯកឧត្តម នេត្រ ភក្ត្រា រដ្ឋមន្រ្តីក្រសួងព័ត៌មាន អំពាវនាវឱ្យអ្នកសារព័ត៌មាន ដែលចុះយកព័ត៌មាននៅព្រំដែនជម្លោះ ជៀសវាងប្រើប្រាស់សម្លៀកបំពាក់ ឬមួក និងសម្ភារមួយចំនួន ដែលស្រដៀងនឹងឯកសណ្ឋាន និងសម្ភារកងទ័ព ដើម្បីកុំឱ្យមានការយល់ច្រឡំ ឬធ្វើឱ្យសត្រូវឈ្លានពានគិតថាជាកងទ័ព។

ដើម្បីបញ្ចៀសនូវរាល់ហានិភ័យ ដែលអាចកើតឡើងជាយថាហេតុណាមួយចំពោះអ្នកសារព័ត៌មានជាតិនិងអន្តរជាតិ រួមនឹងបងប្អូនប្រជាពលរដ្ឋ ដូច្នេះគួរបងប្អូនចៀសវាងការប្រើប្រាស់សម្លៀកបំពាក់ សម្ភារដែលមានពណ៌ស្រដៀងនឹងកងកម្លាំងប្រដាប់អាវុធ។

ឯកឧត្តម នេត្រ ភក្ត្រា ទឹកចិត្តអ្នកសារព័ត៌មានឱ្យប្រកាន់ខ្ជាប់ គោរពបានល្អនូវស្តង់ដារសុវត្ថិភាពការពារខ្លួនពេលចុះបំពេញភារកិច្ចយកព័ត៌មាននៅតាមទីតាំងនានា ដែលមានការប្រយុទ្ធគ្នា ដូចជាពាក់អាវកាក់ និងមួកមានសញ្ញា «សារព័ត៌មាន» ឬ «PRESS»។ ដូច្នេះករណីអ្នកសារព័ត៌មាន ត្រូវការអាវកាក់ «សារព័ត៌មាន» សូមទំនាក់ទំនងមកអគ្គនាយកដ្ឋានព័ត៌មាននិងសោតទស្សន៍ នៃក្រសួងព័ត៌មាន៕