ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ បានរៀបចំវេទិកាការងារ សន្តិសុខសង្គម និងបណ្ដុះបណ្ដាលវិជ្ជាជីវៈ នៅស្រុកមង្គលបូរី ខេត្តបន្ទាយមានជ័យ ដើម្បីនាំយកឱកាសការងារដោយផ្ទាល់ជូនដល់អតីតពលករ និងយុវជនក្នុងមូលដ្ឋានជាង ២ពាន់កន្លែង។

ក្នុងឱកាសនោះ ឯកឧត្តម សាន គឹមហុង អនុរដ្ឋលេខាធិការក្រសួងការងារ បានបញ្ជាក់ថា បច្ចុប្បន្នមានក្រុមហ៊ុន សហគ្រាស និងរោងចក្រចំនួន៥ កំពុងផ្ដល់ឱកាសការងារសរុបចំនួន ២ ៦៥០ កន្លែង លើមុខជំនាញផ្សេងៗគ្នា វេទិកានេះបានទាក់ទាញប្រជាពលរដ្ឋ និងយុវជនចូលរួមប្រមាណ ៥០០ នាក់ ដើម្បីស្វែងរកការងារធ្វើភ្លាមៗ និងចុះឈ្មោះចូលរៀនជំនាញ TVET។

ឯកឧត្តម សាន គឹមហុង បានលើកទឹកចិត្តដល់យុវជន និងពលករ ឱ្យចាប់យកឱកាសការបណ្ដុះបណ្ដាលជំនាញបច្ចេកទេស តាមរយៈកម្មវិធីបណ្តុះបណ្តាលជំនាញ ១,៥ លាននាក់ (TVET 1.5M) ដើម្បីបង្កើនសមត្ថភាព និងទទួលបានប្រាក់ចំណូលខ្ពស់នាពេលអនាគត។ នេះគឺជាគោលនយោបាយចម្បងរបស់ សម្ដេចធិបតី ហ៊ុន ម៉ាណែត ក្នុងគោលបំណងផ្តល់ជំនាញTVET យ៉ាងតិចមួយដល់យុវជនមកពីគ្រួសារក្រីក្រ និងគ្រួសារងាយរងហានិភ័យ៕