ភ្នំពេញ៖ ថ្ងៃទី៣ ខែកញ្ញា ឆ្នាំ២០២៦ ក្រុមការងារបច្ចេកទេសប្រព្រឹត្តកម្មវិទ្យុសកម្មពហុបំណងនៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដឹកនាំដោយ ឯកឧត្តម ហុង រ៉ាដា អនុរដ្ឋលេខាធិការ បានជួបពិភាក្សាជាមួយក្រុមការងារក្រសួងរ៉ែ និងថាមពល ដឹកនាំដោយ លោក ឡឹក វណ្ណសុបញ្ញា ប្រធាននាយកដ្ឋានថាមពលបរមាណូស៊ីវិល និងជាមន្ត្រីសម្របសម្រួលថ្នាក់ជាតិជាមួយទីភ្នាក់ងារថាមពលបរមាណូអន្តរជាតិ (IAEA) ដើម្បីពិភាក្សាអំពីបញ្ហាប្រឈម និងដំណោះស្រាយ ក្របខ័ណ្ឌបទប្បញ្ញត្តិ ព្រមទាំងកិច្ចសហប្រតិបត្តិការជាមួយស្ថាប័នពាក់ព័ន្ធ ក្នុងការជំរុញការចាប់យក និងការប្រើប្រាស់បច្ចេកវិទ្យា eBeam នៅកម្ពុជា។

ក្រសួងរ៉ែ និងថាមពលបានបង្ហាញការគាំទ្រដល់ក្រសួង ឧ.វ.ប.ន. លើការងារផ្នែកបទប្បញ្ញត្តិពាក់ព័ន្ធនឹងការនាំចូល និងការប្រើប្រាស់បច្ចេកវិទ្យា eBeam ដែលជាជំហានសំខាន់ក្នុងការបង្កើតបរិយាកាសអំណោយផលសម្រាប់ការអនុវត្ត និងពង្រីកការប្រើប្រាស់បច្ចេកវិទ្យានេះនៅកម្ពុជា។