ភ្នំពេញ៖ ថ្ងៃទី២៧ ខែតុលា ឆ្នាំ២០២៦ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានទទួលជួបលោកស្រីបណ្ឌិត Than Thi Ha នាយិកាស្តីទីនៃអង្គការទស្សនៈពិភពលោក (World Vision) ប្រចាំកម្ពុជា និងបានពិភាក្សាឱកាសពង្រឹងកិច្ចសហប្រតិបត្តិការក្នុងការពង្រីកសេវាទឹកស្អាត លើកកម្ពស់និរន្តរភាពនៃប្រព័ន្ធផ្គត់ផ្គង់ទឹកស្អាតសហគមន៍ និងគាំទ្រគ្រួសារងាយរងហានិភ័យ។

ឯកឧត្តមរដ្ឋមន្ត្រីបានលើកទឹកចិត្តឱ្យអង្គការ World Vision តម្រង់ទិសអន្តរាគមន៍របស់ខ្លួនក្នុងវិស័យទឹកស្អាតនាពេលអនាគត ឱ្យស្របតាមអាទិភាពអភិវឌ្ឍន៍រយៈពេលវែងរបស់កម្ពុជា ជាពិសេសការផ្លាស់ប្តូរពីប្រព័ន្ធផ្គត់ផ្គង់ទឹកស្អាតខ្នាតតូចតាមសហគមន៍ ទៅរកសេវាផ្គត់ផ្គង់ទឹកស្អាតតាមបណ្តាញ ដែលគ្រប់គ្រងដោយប្រតិបត្តិករអាជីព។

ឯកឧត្តមបានស្នើឱ្យ World Vision ពិចារណាផ្តល់អន្តរាគមន៍ ដោយគាំទ្រដល់គ្រួសារក្រីក្រក្នុងការបង់ថ្លៃសេវាភ្ជាប់បណ្តាញ លើកកម្ពស់ការយល់ដឹងពីការប្រើប្រាស់ទឹកស្អាតប្រកបដោយសុវត្ថិភាព និងវិនិយោគលើការពង្រីកបណ្តាញទៅតំបន់ក្បែរចុងបណ្តាញ (Last-mile connection)។

ឯកឧត្តមរដ្ឋមន្ត្រីបានលើកឡើងថា៖ "នៅតំបន់ដែលមានបណ្តាញទឹកស្អាតស្រាប់ ឬបណ្តាញទឹកស្អាតដែលអាចពង្រីកទៅដល់សហគមន៍ យើងគួរផ្តល់អាទិភាពលើការជួយឱ្យប្រជាពលរដ្ឋអាចតភ្ជាប់

បណ្តាញទឹកស្អាត ជាជាងការវិនិយោគបន្ថែមលើប្រព័ន្ធទឹកស្អាតខ្នាតតូច ដែលអាចមិនមាននិរន្តរភាពក្នុងរយៈពេលវែង។"

ឯកឧត្តមក៏បានជម្រាបជូនពីកំណែទម្រង់ដែលក្រសួងកំពុងអនុវត្ត ដើម្បីលើកកម្ពស់ប្រសិទ្ធភាពនៃការ

ផ្តល់​សេវារបស់ប្រតិបត្តិករទឹកស្អាតឯកជន ពង្រឹងការអនុវត្តច្បាប់ និងបទប្បញ្ញត្តិ និងជំរុញការវិនិយោគលើហេដ្ឋារចនាសម្ព័ន្ធទឹកស្អាត។

ឯកឧត្តមបានសង្កត់ធ្ងន់ថា ការផ្លាស់ប្តូរប្រព័ន្ធផ្គត់ផ្គង់ទឹកស្អាតសហគមន៍ ទៅជាប្រព័ន្ធអាជីព ត្រូវផ្អែកលើការវាយតម្លៃករណីជាក់លាក់នីមួយៗ អំពីលទ្ធភាពបច្ចេកទេស និរន្តរភាពហិរញ្ញវត្ថុ និងគុណភាពសេវាកម្ម។

លោកស្រីបណ្ឌិត Than Thi Ha បានបង្ហាញអំពីកម្មវិធីទឹកស្អាត និងអនាម័យរបស់អង្គការ World Vision រួមទាំងប្រព័ន្ធផ្គត់ផ្គង់ទឹកស្អាតសហគមន៍តាមបំពង់ចំនួន ១២៥ តំបន់ ព្រមទាំងបានបង្ហាញចំណាប់អារម្មណ៍សហការជាមួយក្រសួង ដើម្បីអភិវឌ្ឍគំរូគ្រប់គ្រង និងប្រតិបត្តិការប្រព័ន្ធផ្គត់ផ្គង់ទឹកស្អាតប្រកបដោយនិរន្តរភាព។

ភាគីទាំងពីរនឹងបន្តកិច្ចពិភាក្សា និងផ្លាស់ប្តូរបច្ចេកទេស រួមទាំងការសហការ ក្នុងការវាយតម្លៃដំណោះស្រាយទឹកស្អាតសហគមន៍ដែលមានស្រាប់ ការសិក្សាលទ្ធភាពឧបត្ថម្ភថ្លៃតភ្ជាប់បណ្តាញ និងការសម្របសម្រួលផែនការយុទ្ធសាស្ត្របន្ទាប់ រយៈពេល ៥ ឆ្នាំ របស់អង្គការ World Vision ឱ្យស្របតាមគោលដៅរបស់កម្ពុជា ក្នុងការសម្រេចសកលកម្មសេវាទឹកស្អាតនៅឆ្នាំ២០៣០។