ភ្នំពេញ៖ មន្ត្រីជំនាញរបស់អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) ខេត្តកណ្តាល បានសហការជាមួយការិយាល័យស្រាវជ្រាវ និងបង្រ្កាបអំពើរត់ពន្ធតំបន់២ សាខាគយនិងរដ្ឋាករខេត្តកណ្តាល បានត្រួតពិនិត្យ និងឃាត់បានសាច់បង្កកនាំចូលតាមច្រកជ្រៃធំ សរុបចំនួន ៦ ០៥០គីឡូក្រាម ដែលដឹកជញ្ជូនមិនតាមលក្ខណៈស្តង់ដារបច្ចេកទេស និងខូចគុណភាព។

តាមការចុះផ្សាយរបស់ ក.ប.ប. នាថ្ងៃទី២៥ ខែឧសភា ឆ្នាំ២០២៤ សាច់បង្កកជាង ៦តោនដែលខូចគុណភាពនេះ មានដូចជា៖ សាច់ក្របីបង្កក ម៉ាក CORAL ចំនួន១០០កេស ស្មើនឹង ២ ១០០គីឡូក្រាម ដែលមានប្រភពប្រទេសឥណ្ឌា, សាច់ជ្រូកបង្កកម៉ាក APK ចំនួន២០០កេស ស្មើនឹង ៣ ៤០០គីឡូក្រាម ប្រភពប្រទេសរុស្សី និងមឹកបង្កក ម៉ាក FRESH ចំនួន៥០កេស ស្មើនឹង ៥៥០គីឡូក្រាម ដែលនាំមកពីប្រទេសចិន។

គួរបញ្ជាក់ថា សាច់បង្កកជាង ៦តោននេះ ត្រូវបានមន្ត្រីជំនាញ ក.ប.ប. និងស្ថាប័នពាក់ព័ន្ធ ដុតកម្ទេចចោលតាមនីតិវិធី ដើម្បីជៀសវាងការប៉ះពាល់ដល់សុខភាពអ្នកប្រើប្រាស់ ប្រសិនបើផលិតផលសាច់បង្កកទាំងនោះបានលក់នៅលើទីផ្សារ នៅក្នុងបរិវេណការិយាល័យគយនិងរដ្ឋាករជ្រៃធំ៕