ភ្នំពេញ៖ មូលនិធិគន្ធបុប្ផាកម្ពុជា រៀបចំយុទ្ធនាការ «១ម៉ឺនរៀល ១ម៉ឺននាក់» ឆ្នាំ២០២៤ សម្រាប់កុមារកម្ពុជា មានរយៈពេល ១ខែពេញ ដែលចាប់ពីថ្ងៃទី១ ដល់ថ្ងៃទី៣០ ខែមិថុនា ឆ្នាំ២០២៤ ដើម្បីចូលរួមអបអរទិវាកុមារអន្តរជាតិ ១មិថុនា ដោយមានលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជាប្រធានកិត្តិយសនៃមូលនិធិគន្ធបុប្ផាកម្ពុជា និងអញ្ជើញជាអធិបតីក្នុងពិធីបើកយុទ្ធនាកានៅថ្ងៃទី១ មិថុនា ខាងមុខ។

តាមសេចក្តីជូនដំណឹងរបស់មូលនិធិគន្ធបុប្ផាកម្ពុជា កាលពីថ្ងៃទី២៩ ឧសភា យុទ្ធនាការ «១ម៉ឺនរៀល ១ម៉ឺននាក់»នេះ ជាយុទ្ធនាការប្រចាំឆ្នាំរបស់មូលនិធិគន្ធបុប្ផាកម្ពុជា ដែលរៀបចំឡើងដើម្បីបំផុសស្មារតី«ខ្មែរជួយខ្មែរ» តាមរយៈការអំពាវនាវឱ្យចូលរួមបរិច្ចាគពីសប្បុរសជនទាំងក្នុង និងក្រៅប្រទេស ដល់មូលនិធិគន្ធបុប្ផាកម្ពុជា ដើម្បីរួមគ្នាផ្តល់ក្តីស្រលាញ់ដល់កុមារកម្ពុជា។

យុទ្ធនាការ «១ម៉ឺនរៀល ១ម៉ឺននាក់» សម្រាប់កុមារកម្ពុជានេះ នាពេលកន្លងមក ទទួលបានការគាំទ្រយ៉ាងច្រើន ទាំងក្នុងទិដ្ឋភាពជាថវិកា និងអ្នកចូលរួម ដើម្បីធានានិរន្តរភាពរបស់មន្ទីរពេទ្យគន្ធបុប្ផា ដែលជាមន្ទីរពេទ្យជាតិ ពិនិត្យ និងព្យាបាលទារក កុមាររាប់លាននាក់ ជាមួយនឹងការចំណាយថវិកាប្រចាំឆ្នាំប្រមាណ ៤០លានដុល្លារ៕