ភ្នំពេញ៖ រដ្ឋបាលខេត្តកណ្ដាល នឹងបិទចរាចរណ៍ចំពោះរថយន្ដដឹកទំនិញធុនធ្ងន់ លើកំណាត់ផ្លូវជាតិលេខ១ ចាប់ពីផ្លូវបំបែកខ្នែងផ្លូវក្រវាត់ក្រុងទី៣ ត្រង់កំពង់ផែស្វយ័ត ក្រុងភ្នំពេញ គ.ម ៣០+១៤០ ភូមិកណ្ដាលលើ ឃុំបន្ទាយដែក ស្រុកកៀនស្វាយ រហូតដល់អ្នកលឿងត្រើយខាងលិច ជាបណ្តោះអាសន្ននៅថ្ងៃទី០៥ ខែសីហា ឆ្នាំ២០២៤។ ការបិទចរាចរណ៍នេះ នឹងធ្វើឡើងចាប់ពីម៉ោង ១២:០០កណ្ដាលអាធ្រាត ដល់ម៉ោង ១៣:០០រសៀល នាថ្ងៃទី០៥ ខែសីហា។

បើតាមសេចក្តីជូនដំណឹងរបស់រដ្ឋបាលខេត្តកណ្ដាល កាលពីថ្ងៃទី៣១ ខែកក្កដា ឆ្នាំ២០២៤ ការបិទចរាចរណ៍នេះ គឺដើម្បីអបអរពិធីសម្ពោធ «ការដ្ឋានសាងសង់ព្រែកជីកហ្វូណនតេជោ» ក្រោមអធិបតីភាពរបស់សម្តេចធិបតីនាយកមន្ត្រី ហ៊ុន ម៉ាណែត និងលោកជំទាវ ពេជ ចន្ទមុន្នី និងដើម្បីឱ្យព្រឹត្តិការណ៍ប្រវត្តិសាស្រ្តនេះដំណើរការដោយរលូនបានផងដែរ។

ក្នុងព្រឹត្តិការណ៍នេះ រថយន្ដដឹកអ្នកដំណើរ និងរថយន្ដធុនធ្ងន់ ដែលធ្វើដំណើរចូលរាជធានីភ្នំពេញ អាចធ្វើដំណើរចេញពីផ្លូវជាតិលេខ១ ពីអ្នកលឿងត្រើយខាងកើត វាងតាមផ្លូវជាតិលេខ១១ ដល់រង្វង់មូលស្វាយអន្ទរ បន្តមកផ្លូវជាតិលេខ៨ ដល់ស្ពានព្រែកតាមាក់ ឆ្លងចូលផ្លូវជាតិលេខ៦ និងបន្តធ្វើដំណើរតាមមហាវិថីឈ្នះឈ្នះ ឆ្ពោះមកផ្លូវជាតិលេខ៥។ ជាមួយគ្នានេះ រថយន្ដធុនធ្ងន់ និងរថយន្ដដឹកអ្នកដំណើរពីភ្នំពេញទៅអ្នកលឿង អាចវាងត្រឡប់តាមទិសដៅនេះដូចគ្នា។ សូមជម្រាបថា ក្នុងព្រឹត្តិការណ៍នេះដែរ រថយន្ដគ្រួសារអាចធ្វើចរាចរណ៍បានជាធម្មតាទេ៕