ភ្នំពេញ​៖​ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានអញ្ជើញជាអធិបតីក្នុងពិធីសម្ពោធសៀវភៅ «ស្នាមញញឹមខ្មែរ» ឬជាភាសាបារាំង «Le Sourire du peuple cambodgien» ដែលជាស្នាដៃរួមគ្នារវាងអ្នកនិពន្ធខ្មែរ និងបរទេស តាមរយៈកិច្ចសហការរបស់ក្រុមសារព័ត៌មានថ្មីៗ និងគ្រឹះស្ថានបោះពុម្ពផ្សាយ Sipar។

ក្នុងឱកាសនោះ ឯកឧត្តមបានសម្តែងការកោតសរសើរ និងវាយតម្លៃខ្ពស់ចំពោះគំនិតផ្តួចផ្តើម ព្រមទាំងកិច្ចខិតខំប្រឹងប្រែងរបស់អ្នកនិពន្ធ អ្នករៀបចំ និងដៃគូពាក់ព័ន្ធទាំងអស់ ដែលបានរួមគ្នាបង្កើតស្នាដៃនេះឡើង។

ឯកឧត្តមបានគូសបញ្ជាក់ថា សៀវភៅនេះមានអត្ថន័យលើសពីការបោះពុម្ពផ្សាយស្នាដៃអក្សរសិល្ប៍ ឬការប្រមូលផ្តុំរូបភាព និងរឿងរ៉ាវអំពីកម្ពុជា ពោលគឺជាការចូលរួមចំណែកក្នុងការថែរក្សា លើកតម្កើង និងផ្សព្វផ្សាយអត្តសញ្ញាណ វប្បធម៌ និងគុណតម្លៃរបស់ប្រជាជាតិខ្មែរ។