ភ្នំពេញ៖ ធនាគារជាតិនៃកម្ពុជា, តំណាងធនាគារកណ្តាល, ស្ថាប័នរៀបចំគោលនយោបាយ, ស្ថាប័នហិរញ្ញវត្ថុ និងដៃគូអភិវឌ្ឍន៍នានា សរុបប្រមាណ៩០នាក់ មកពីប្រទេសចំនួន១៤ ដើម្បីចូលរួមពិភាក្សាក្នុងវេទិកាគោលនយោបាយតំបន់ស្តីពី«ការផ្តល់ហិរញ្ញប្បទានដល់សហគ្រាសកសិកម្មធុនតូចនិងមធ្យម ដើម្បីជំរុញការអភិវឌ្ឍក្នុងប្រទេស» នាថ្ងៃទី៨ ខែសីហា ឆ្នាំ២០២៤។

របៀបវារៈចំនួន២ ដែលបានលើកមកពិភាក្សារួមគ្នានោះ គឺទី១. នយោបាយសម្រាប់បន្ថយគម្លាតហិរញ្ញប្បទាន ដើម្បីគាំទ្រដល់ការអភិវឌ្ឍសហគ្រាសកសិកម្មធុនតូចនិងមធ្យម និងទី២. តួនាទី និងយន្តការស្ថាប័នក្នុងការផ្តល់ហិរញ្ញប្បទានបន្ថែមដល់ សហគ្រាសកសិកម្មធុនតូចនិងមធ្យម បទពិសោធ និងការអនុវត្តជាក់ស្តែង។ នេះបើតាមការចុះផ្សាយរបស់ធនាគារជាតិនៃកម្ពុជា នៅថ្ងៃទី០៨ សីហាម្សិលមិញ។

ក្នុងវេទិកាគោលនយោបាយថ្នាក់តំបន់ ដែលប្រារព្ធធ្វើនៅទឹកដីអង្គរ ខេត្តសៀមរាម ដោយមានតំណាងស្ថាប័នចូលរួមទាំងអស់ ដែលជាសមាជិករបស់សមាគមឥណទានកសិកម្ម និងជនបទតំបន់អាស៊ីប៉ាស៊ីហ្វិក (APRACA) នេះ ក្រោមវត្តមានរបស់ឯកឧត្តម រ័ត្ន សុវណ្ណនរៈ ទេសាភិបាលរង ធនាគារជាតិនៃកម្ពុជា៕