ភ្នំពេញ៖ អាកាសយានដ្ឋានអន្តរជាតិសៀមរាបអង្គរ ទទួលបានជើងហោះហើរចេញ-ចូល ចំនួន ១៤ ៥៥៦ជើង និងអ្នកដំណើរសរុបចំនួន ១ ៣០០ ០៤៨នាក់ ចាប់តាំងពីបើកដំណើរការបានជិត ១ឆ្នាំ គឺពីថ្ងៃទី១៦ ខែតុលា ឆ្នាំ២០២៣ ដល់ថ្ងៃទី៣០ ខែកញ្ញា ឆ្នាំ២០២៤។ តាមការចុះផ្សាយរបស់រដ្ឋលេខាធិការដ្ឋានអាកាសចរណ៍ស៊ីវិល នាថ្ងៃទី១៦ ខែតុលា ឆ្នាំ២០២៤ រយៈពេលជិត ១ឆ្នាំនេះ អាកាសយានដ្ឋានអន្តរជាតិសៀមរាប ទទួលបានទំនិញតាមផ្លូវអាកាសជាង ៨២តោន។

ចំពោះ រយៈពេល ៩ខែក្នុងឆ្នាំ២០២៤ វិញ អាកាសយានដ្ឋានអន្តរជាតិសៀមរាបអង្គរ ទទួលបានជើងហោះហើរចំនួន ១០ ៩៨៩ជើង កើនឡើងប្រមាណ ២៤%, អ្នកដំណើរ សរុបចំនួន ៩៧៤ ២០៣នាក់ ដែលមានការកើនឡើងប្រមាណ ៣១%, ទំនិញតាមផ្លូវអាកាស មានចំនួន ៧៦តោន មានការថយចុះប្រមាណ ៤៦% និងមានការរំពឹងថា អាកាសយានដ្ឋាន នឹងទទួលបានអ្នកដំណើរ ដល់ ១,៥០លាននាក់នៅដំណាច់ឆ្នាំ២០២៤។

តាមរយៈកិច្ចសហការក្នុងការអនុវត្តផែនការអភិវឌ្ឍន៍ទេសចរណ៍ខេត្តសៀមរាប ឆ្នាំ២០២៥-២០២៨នេះ ខេត្តសៀមរាប នឹងក្លាយជាគោលដៅទេសចរណ៍ ក្នុងការទាក់ទាញភ្ញៀវអន្តរជាតិប្រមាណ ៧,៥លាននាក់ និងភ្ញៀវជាតិប្រមាណ ១០លាននាក់ និងបង្កើតការងារបានប្រមាណ ១,៦លានកន្លែង នៅឆ្នាំ២០៣៥។ ក្នុងឱកាសបង្កើតការងារប្រមាណ ១,៦លានកន្លែងនេះ ការងារដោយផ្ទាល់ក្នុងវិស័យទេសចរណ៍មានប្រមាណ ៩៤ម៉ឺនកន្លែង ដែលបង្កើនចំណូលសេដ្ឋកិច្ចជាតិប្រមាណ ៥,៩ពាន់លានដុល្លារ នៅឆ្នាំ២០៣៥៕