ភ្នំពេញ៖ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងថា រោងចក្រផលិតទឹកស្អាតបឹងធំ ដែលមានសមត្ថភាពផលិតទឹកស្អាត ៦ពាន់ម៉ែត្រគូបក្នុងមួយថ្ងៃ នឹងរួមចំណែកកសាងហេដ្ឋារចនាសម្ព័ន្ធរូបវន្ត គាំទ្រដល់ការពង្រីកមូលដ្ឋានឧស្សាហកម្ម អាជីវកម្ម និងសេវាកម្មគ្រប់វិស័យ ដែលកំពុងមានការរីកចម្រើនយ៉ាងឆាប់រហ័ស។

ក្នុងពិធីដាក់ឱ្យដំណើរការជាផ្លូវការរោងចក្រផលិតទឹកស្អាតបឹងធំ នាថ្ងៃទី១៦ ខែធ្នូ ឆ្នាំ២០២៤ ឯកឧត្តម ហែម វណ្ណឌី បានបន្តថា រោងចក្រថ្មីនេះ នឹងពង្រីកវិសាលភាពសេវាទឹកស្អាតដល់ពលរដ្ឋប្រមាណ ៣ពាន់គ្រួសារ នៅក្នុង១០ភូមិ នៃខណ្ឌកំបូល រាជធានីភ្នំពេញ។ ជាពិសេស បានរួមចំណែកដល់ការអនុវត្តយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល ដែលកំណត់យកទឹកជាអាទិភាពគន្លឹះទីបីផងដែរ។ រោងចក្រផលិតទឹកស្អាតបឹងធំនេះ ជាសមិទ្ធផលទី២ របស់រដ្ឋាករទឹកស្វយ័តក្រុងភ្នំពេញ បន្ទាប់ពីរោងចក្រប្រព្រឹត្តិកម្មទឹកស្អាតមេ្លច នៅខេត្តកំពត។ រោងចក្រថ្មីនេះ ផ្គត់ផ្គង់ទឹកស្អាតដែលមានគុណភាពស្របតាមស្តង់ដារគុណភាពទឹកស្អាតថ្នាក់ជាតិ និងស្តង់ដារគុណភាពទឹកស្អាតរបស់អង្គការសុខភាពពិភពលោក។

ក្នុងពិធីសម្ពោធដែលមានការចូលរួមពីឯកឧត្តម AMAKAWA Hirofumi អនុរដ្ឋមន្ត្រីក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍របស់ជប៉ុន រដ្ឋមន្ត្រីឧស្សាហកម្ម ក៏បានស្នើឱ្យភាគីពាក់ព័ន្ធទាំងអស់ ចូលរួមការពារ និងថែទាំហេដ្ឋារចនាសម្ព័ន្ធទឹកស្អាត ពង្រីកបណ្តាញចែកចាយ និងរក្សាស្ទឹងព្រែកត្នោត ដែលជាប្រភពទឹកសម្រាប់រយៈពេលវែង។ រោងចក្រផលិតទឹកស្អាតបឹងធំនេះ គឺស្ថិតនៅក្រោមគម្រោងជំនួយឥតសំណងពីរដ្ឋាភិបាលជប៉ុន និងថវិកាបដិភាគរបស់រដ្ឋាករទឹកស្វយ័តក្រុងភ្នំពេញ៕